കണ്ണൂര്‍: പി ഇന്ദിരയെ കണ്ണൂര്‍ കോര്‍പറേഷന്‍ മേയറായി പ്രഖ്യാപിച്ച് കെ സുധാകരന്‍. കോണ്‍ഗ്രസ് കോര്‍ കമ്മിറ്റിയിലാണ് തീരുമാനം. ഐക്യകണ്‌ഠേന എടുത്ത തീരുമാനമാണെന്ന് അദ്ദേഹം പറഞ്ഞു. ഇന്ദിര നിലവിലെ ഡെപ്യൂട്ടി മേയറാണ് എന്നതും പരിഗണിച്ചു, കോര്‍ കമ്മിറ്റിയില്‍ ഒരു പേര് മാത്രമാണ് പരിഗണിച്ചത് എന്നും സുധാകരനും പറഞ്ഞു. 

കണ്ണൂര്‍ കോര്‍പറേഷനിലാണ് ആദ്യമായി കോണ്‍ഗ്രസ് മേയറെ പ്രഖ്യാപിക്കുന്നത്. കെ.സി വേണുഗോപാല്‍, കെ. സുധാകരന്‍ എന്നിവരുടെ പിന്തുണ പി. ഇന്ദിരയ്ക്കായിരുന്നു. 

ജീവിതത്തില്‍ പാര്‍ട്ടി തന്ന ഏറ്റവും വലിയ അംഗീകാരമാണിതെന്ന് മേയര്‍ പ്രഖ്യാപനത്തിന് ശേഷം ഇന്ദിര പ്രതികരിച്ചു.  കൂടുതല്‍ വികസന പ്രവര്‍ത്തനങ്ങള്‍ നടത്തുമെന്നും സി.പി.എം ഉന്നയിച്ച ആരോപണങ്ങളെല്ലാം കളവെന്ന് തെളിഞ്ഞു. ഇത് ജനങ്ങള്‍ തള്ളികളഞ്ഞു എന്നതിന്റെ തെളിവാണ് ഈ വിജയം. കണ്ണൂരിന്റെ മുഖഛായ മാറ്റുമെന്നും ഇന്ദിര പറഞ്ഞു.

2015 ല്‍ കണ്ണൂര്‍ കോര്‍പറേഷന്‍ ആയതു മുതല്‍ കൗണ്‍സിലറായ ഇന്ദിര തുടര്‍ച്ചയായി മൂന്നാം തവണയാണ് ജയിക്കുന്നത്. മുസ് ലിം ലീഗിലെ കെ.പി താഹിറിനെയാണ് ഡെപ്യൂട്ടി മേയര്‍ സ്ഥാനത്തേക്ക് പരിഗണിക്കുന്നത്.