ഷാര്‍ജ: ഷാര്‍ജ ഡെസേര്‍ട്ട് പൊലിസ് പാര്‍ക്കില്‍ വാരാന്ത്യങ്ങളില്‍ പ്രവേശന നിയന്ത്രണം ഏര്‍പ്പെടുത്തി. 2026 ജനുവരി 5 വരെ ഈ നിയന്ത്രണം നിലനില്‍ക്കുമെന്ന് അധികൃതര്‍ വെളിപ്പെടുത്തി. വെള്ളി, ശനി ദിവസങ്ങളില്‍ ഷാര്‍ജയിലെ സര്‍ക്കാര്‍ ജീവനക്കാര്‍ക്കും അവരുടെ കുടുംബാംഗങ്ങള്‍ക്കും മാത്രമായിരിക്കും ഇനി ഡെസേര്‍ട്ട് പൊലിസ് പാര്‍ക്കില്‍ പ്രവേശനം അനുവദിക്കുകയെന്ന് അധികൃതര്‍ അറിയിച്ചു.

പാര്‍ക്കിലേക്ക് സന്ദര്‍ശകരുടെ തിരക്ക് അനിയന്ത്രിതമായി വര്‍ധിച്ച സാഹചര്യത്തിലാണ് ഈ പുതിയ ക്രമീകരണം. അതേസമയം, ആഴ്ചയിലെ മറ്റു ദിവസങ്ങളില്‍ (തിങ്കള്‍ മുതല്‍ വ്യാഴം വരെ) പൊതുജനങ്ങള്‍ക്ക് പാര്‍ക്കിലേക്ക് പ്രവേശനം തുടരാം. ശൈത്യകാലം ആസ്വദിക്കാനെത്തുന്ന കുടുംബങ്ങള്‍ക്കും സന്ദര്‍ശകര്‍ക്കും മികച്ച സൗകര്യങ്ങള്‍ ഉറപ്പു വരുത്തുന്നതിന്റെ ഭാഗമായാണ് തിരക്കേറിയ വാരാന്ത്യങ്ങളില്‍ സര്‍ക്കാര്‍ ജീവനക്കാര്‍ക്കായി മാറ്റി വയ്ക്കാന്‍ തീരുമാനിച്ചത്.

ഈ മാസം 13ന് വൈകുന്നേരം 4 നും രാത്രി 10നുമിടയിലായി ഷാര്‍ജ പൊലിസ് ജനറല്‍ കമാന്‍ഡ് 'പൊലിസ് ഡെസേര്‍ട്ട് പാര്‍ക്കി'ന്റെ ആറാം പതിപ്പ് അവതരിപ്പിച്ചിരുന്നു. പൊലിസ് സേനാംഗങ്ങളുടെയും അവരുടെ കുടുംബങ്ങളുടെയും സമൂഹത്തിന്റെയും ക്ഷേമം മെച്ചപ്പെടുത്താന്‍ ലക്ഷ്യമിട്ടുള്ള സുപ്രധാന വാര്‍ഷിക സംരംഭമായിരുന്നു ഇത്.

സുരക്ഷാസാമൂഹിക പരിപാടികള്‍ സംഘടിപ്പിക്കാനുള്ള തിയേറ്റര്‍, പൈതൃക ഗ്രാമം, വിനോദ ഗ്രാമം, സാന്‍ഡ്‌കോര്‍ട്‌സ് കോര്‍ണര്‍ തുടങ്ങിയ പൈതൃക പ്രമേയമുള്ള പ്രദേശങ്ങള്‍ എന്നിവ പാര്‍ക്കില്‍ ഉണ്ട്.

ബാര്‍ബിക്യൂകള്‍ക്കായി നിയുക്ത സ്ഥലങ്ങളുള്ള ഒരു റസ്റ്ററന്റ് കോര്‍ണറും, 100 പേര്‍ക്ക് വരെ ശേഷിയുള്ള പ്രാര്‍ഥനാ ഹാളും ഇതില്‍ ഉള്‍പ്പെടുന്നു.

ചരിത്രപരമായ വാസ്തുവിദ്യാ ശൈലി പിന്തുടര്‍ന്ന് ഷാര്‍ജ പൊലിസിന്റെ കറക്ഷണല്‍ ആന്‍ഡ് പണിഷന്റ് ഇന്‍സ്റ്റിറ്റിയൂഷനിലെ തടവുകാര്‍ പുനരുപയോഗ വസ്തുക്കള്‍ ഉപയോഗിച്ചാണ് ഇവിടത്തെ പ്രാര്‍ഥനാ ഹാള്‍ നിര്‍മിച്ചത്.

നിത്യവും വൈകുന്നേരം 4 മുതല്‍ രാത്രി 10 വരെ, 2026 ജനുവരി 5 വരെ ഈ പാര്‍ക്ക് പ്രവര്‍ത്തിക്കും.

Sharjah's Desert Police Park has announced it will be temporarily allocating the weekend to only government employees in the emirate and their families.