മനാമ: ഫിലിപ്പീന്‍സ് റിപ്പബ്ലിക്കിന്റെ ബഹ്‌റൈനിലെ പുതിയ അംബാസിഡറായി നിയമിതനായ ജനിസ് ജയിം ഗല്ലേഗ ബഹ്‌റൈന്‍ ഉപപ്രധാനമന്ത്രി ശൈഖ് ഖാലിദ് ബിന്‍ അബ്ദുള്ള അല്‍ ഖലീഫയെ സന്ദര്‍ശിച്ചു. ഗുദൈബിയ പാലസില്‍ നടന്ന കൂടിക്കാഴ്ചയില്‍ അദ്ദേഹം തന്റെ ഔദ്യോഗിക അധികാരപത്രം സമര്‍പ്പിച്ചു.

ബഹ്‌റൈനും ഫിലിപ്പീന്‍സും തമ്മില്‍ വര്‍ഷങ്ങളായി നിലനില്‍ക്കുന്ന സൗഹൃദബന്ധങ്ങള്‍ കൂടുതല്‍ ശക്തമാകുന്നതില്‍ സന്തോഷം പ്രകടിപ്പിച്ചു ബഹ്‌റൈന്‍ ഉപപ്രധാനമന്ത്രി. പരസ്പര ബഹുമാനവും സഹകരണവും അടിസ്ഥാനമാക്കിയുള്ള ഈ ബന്ധം വരും കാലഘട്ടത്തിലും തുടരണമെന്നും അദ്ദേഹം വ്യക്തമാക്കി.

ബഹ്‌റൈനിലെ വിവിധ മേഖലകളില്‍ ജോലി ചെയ്യുന്ന ഫിലിപ്പീന്‍സ് പൗരന്മാര്‍ രാജ്യത്തിന്റെ പുരോഗതിയില്‍ നിര്‍ണായക പങ്ക് വഹിക്കുന്നുണ്ടെന്നും ശൈഖ് ഖാലിദ് വ്യക്തമാക്കി. സാമ്പത്തിക സഹകരണം, നിക്ഷേപ സാധ്യതകള്‍, ഭക്ഷ്യസുരക്ഷ ഉള്‍പ്പെടെയുള്ള മേഖലകളില്‍ ഇരുരാജ്യങ്ങളും ചേര്‍ന്ന് കൂടുതല്‍ പ്രവര്‍ത്തിക്കാനുള്ള സാധ്യതകളെക്കുറിച്ചും ഇരുവരും ചര്‍ച്ച ചെയ്തു.

കൂടിക്കാഴ്ചയില്‍ ലഭിച്ച സൗഹൃതപരമായ സ്വീകരണത്തിന് നന്ദി അറിയിച്ച അംബാസിഡര്‍ ഗല്ലേഗ, ബഹ്‌റൈനുമായുള്ള ബന്ധം കൂടുതല്‍ ശക്തിപ്പെടുത്താന്‍ ഫിലിപ്പീന്‍സ് ആഗ്രഹിക്കുന്നുവെന്ന് പറഞ്ഞു. ഇരുരാജ്യങ്ങള്‍ക്കും ഗുണകരമായ സഹകരണം മുന്നോട്ട് കൊണ്ടുപോകാന്‍ തന്റെ കാലയളവില്‍ പരമാവധി ശ്രമിക്കുമെന്നും അദ്ദേഹം കൂട്ടിച്ചേര്‍ത്തു.

The newly appointed Philippine Ambassador to Bahrain presented his credentials to Deputy Prime Minister Shaikh Khalid bin Abdullah Al Khalifa, highlighting strong bilateral ties and cooperation in economic and investment sectors.