ന്യൂഡല്‍ഹി: എന്‍.സി.ആര്‍.ടി പാഠപുസ്തക വിവാദത്തില്‍ സുപ്രിം കോടതിയില്‍ നിരുപാധികം മാപ്പ് പറഞ്ഞ് കേന്ദ്രസര്‍ക്കാര്‍. സോളിസിറ്റര്‍ ജനറല്‍ തുഷാര്‍ മേത്തയാണ് കേന്ദ്രസര്‍ക്കാറിന് വേണ്ടി കോടതിയില്‍ ഹാജരായി നിലപാട് അറിയിച്ചത്.

''ഞങ്ങള്‍ നിരുപാധികം ക്ഷമാപണം നടത്തുന്നു'',  പ്രസ്തുത ഉള്ളടക്കത്തിന് ''ഒരു ന്യായീകരണവുമില്ല'' എന്നും കേന്ദ്രം കോടതിയില്‍ സമ്മതിച്ചു. പാഠപുസ്തക വിവാദത്തില്‍  പാഠഭാഗങ്ങള്‍ തയാറാക്കിയവര്‍ക്കെതിരെ കര്‍ശന നടപടിയെടുക്കുമെന്നും ഭാവിയില്‍ വിദ്യാഭ്യാസ മന്ത്രാലയത്തിന്റെ ഒരു പ്രവര്‍ത്തനത്തിലും അവരെ ഭാഗമാക്കില്ലെന്നും കേന്ദ്രസര്‍ക്കാര്‍ കോടതിയെ അറിയിച്ചു. 

'ഗൗരവമായി തന്നെയാണ് വിഷയത്തെ കേന്ദ്രസര്‍ക്കാര്‍ സമീപിച്ചത്. അതുകൊണ്ടാണ് രണ്ട് ജീവനക്കാരേയും മാറ്റിനിര്‍ത്തിയിരിക്കുകയാണ്. ഭാവിയില്‍ വിദ്യാഭ്യാസമന്ത്രാലയത്തിന്റെ ഒരു പ്രവര്‍ത്തനത്തിലും അവര്‍ ഭാഗമാവില്ലെന്ന് ഉറപ്പാക്കുകയും ചെയ്തിട്ടുണ്ട്' തുഷാര്‍ മേത്ത പറഞ്ഞു. 

ALSO READ: 'പുനരധിവാസം ഉറപ്പാക്കാതെ ഒഴിപ്പിക്കരുത്'; ഹല്‍ദ്വാനിയിലെ അരലക്ഷം പേര്‍ക്ക് ആശ്വാസമായി സുപ്രിംകോടതി വിധി; വീണ്ടും ജയിച്ച് ജംഇയ്യത്തുല്‍ ഉലമായെ ഹിന്ദിന്റെ നിയമയുദ്ധം

എന്നാല്‍, രൂക്ഷമായാണ് സുപ്രിം കോടതി പ്രതികരിച്ചത്. മാപ്പ് കൊണ്ട് മാത്രം വിഷയം ഒതുക്കാനാവില്ല-സുപ്രിം കോടതി ചൂണ്ടിക്കാട്ടി. സംഭവത്തില്‍ വിശദമായ അന്വേഷണം നടത്തണമെന്ന് കോടതി നിര്‍ദേശിച്ചു. ഇതിന് പിന്നില്‍ പ്രവര്‍ത്തിച്ചവരെ നിയമത്തിന് മുന്നില്‍ കൊണ്ടു വരികയെന്നത് തങ്ങളുടെ കടമയാണ്. ഉത്തരവാദികളെ കണ്ടെത്തും വരെ തങ്ങള്‍ നിയമനടപടികള്‍ അവസാനിപ്പിക്കില്ലെന്നും കോടതി വ്യക്തമാക്കി. തലകള്‍ ഉരുണ്ടേ മതിയാവൂ എന്ന് ചീഫ് ജസ്റ്റിസ് സൂര്യകാന്ത് മിശ്ര മുന്നറിയിപ്പ് നല്‍കി. ജുഡീഷ്യറിക്ക് നേരെ നിങ്ങള്‍ വെടിയുതിര്‍ത്തിരിക്കുകയാണ്. രക്തംവാര്‍ന്ന് നില്‍ക്കുകയാണ് രാജ്യത്തെ നീതിന്യാ വ്യവസ്ഥ- ചീഫ് ജസ്റ്റിസ് കൂട്ടിച്ചേര്‍ത്തു.

'മിസ്റ്റര്‍ സോളിസിറ്റര്‍, ഇത് മനഃപൂര്‍വ്വമായ നീക്കമാണ്. ജുഡീഷ്യറി അഴിമതി നിറഞ്ഞതാണെന്ന ചിന്ത വിദ്യാര്‍ത്ഥികളില്‍ മാത്രമല്ല, മാതാപിതാക്കളിലും അധ്യാപകരിലും നിറഞ്ഞുനില്‍ക്കും.'

'ഇന്‍സ്റ്റിറ്റൂഷണല്‍ അതോറിറ്റിയെ ദുര്‍ബലപ്പെടുത്താനും ജുഡീഷ്യറിയുടെ അന്തസ്സിനെ താഴ്ത്തിക്കെട്ടാനുമുള്ള ഒരു മനഃപൂര്‍വമായ നീക്കം നടക്കുന്നുണ്ടെന്നാണ് ഞങ്ങള്‍ക്ക് തോന്നിയത്. ഇത് നിയന്ത്രിക്കപ്പെടാതെ പോകാന്‍ അനുവദിച്ചാല്‍, പൊതുജനങ്ങള്‍ക്ക് മുമ്പില്‍ ജുഡീഷ്യല്‍ ഓഫിസിന്റെ പവിത്രത ഇല്ലാതാക്കും.'- ചീഫ് ജസ്റ്റിസ് ചൂണ്ടിക്കാട്ടി. 

എട്ടാം ക്ലാസ്സിലെ എന്‍.സി.ഇ.ആര്‍.ടി പാഠപുസ്തകത്തില്‍ നീതിന്യായ വ്യവസ്ഥയിലെ അഴിമതിയെക്കുറിച്ച് പരാമര്‍ശിച്ചതില്‍ സുപ്രിം കോടതി കഴിഞ്ഞ ദിവസം കടുത്ത അതൃപ്തി രേഖപ്പെടുത്തിയിരുന്നു. ജുഡീഷ്യറിയെ അപകീര്‍ത്തിപ്പെടുത്താന്‍ ഒരാളെയും അനുവദിക്കില്ലെന്നും ചീഫ് ജസ്റ്റിസ് വ്യക്തമാക്കിയിരുന്നു. നീതിന്യായ വ്യവസ്ഥയിലെ അഴിമതിയെക്കുറിച്ച് പാഠപുസ്തകങ്ങളില്‍ ഉള്‍പ്പെടുത്തിയത് കേവലം അശ്രദ്ധയല്ലെന്നും, മറിച്ച് ജുഡീഷ്യറിയുടെ പ്രതിച്ഛായ തകര്‍ക്കാന്‍ ലക്ഷ്യമിട്ടുള്ള കരുതിക്കൂട്ടിയുള്ള നീക്കമാണെന്നുമാണ് ചീഫ് ജസ്റ്റിസ് നിരീക്ഷിച്ചത്. കോടതി ഇടപെടലിന് പിന്നാലെ പുസ്തകം എന്‍.സി.ആര്‍.ടി പിന്‍വലിക്കുകയും ചെയ്തിരുന്നു.

ALSO READ: ജുഡീഷ്യറിയെക്കുറിച്ചുള്ള വിവാദ പാഠഭാഗം: എട്ടാം ക്ലാസിലെ സമൂഹികശാസ്ത്രം പാഠപുസ്തകം പിൻവലിച്ച് എന്‍സിഇആര്‍ടി

centre offers unconditional apology in supreme court over ncert textbook controversy. court orders detailed probe and warns against weakening judiciary.