കുവൈത്ത് സിറ്റി: അധിനിവിഷ്ട ജറുസലേമിലെ വിശുദ്ധ സ്ഥലങ്ങളിൽ വിശ്വാസികൾക്ക് ഏർപ്പെടുത്തിയിരിക്കുന്ന കടുത്ത നിയന്ത്രണങ്ങളെ ശക്തമായി അപലപിച്ച് കുവൈത്ത്. അൽ-അഖ്സ പള്ളിയിലേക്കും നോബിൾ സങ്കേതത്തിലേക്കും വിശ്വാസികൾ പ്രവേശിക്കുന്നത് തടയുന്ന ഇസ്റാഈൽ നടപടി അംഗീകരിക്കാനാവില്ലെന്ന് കുവൈത്ത് വിദേശകാര്യ മന്ത്രാലയം ഔദ്യോഗിക പ്രസ്താവനയിൽ അറിയിച്ചു.

മുസ് ലിം പള്ളികൾക്ക് പുറമെ ക്രിസ്ത്യൻ മതവിഭാഗങ്ങൾക്കെതിരെയുള്ള നിയന്ത്രണങ്ങളെയും കുവൈത്ത് അപലപിച്ചു. ജറുസലേമിലെ ലാറ്റിൻ പാത്രിയർക്കീസിനെയും വിശുദ്ധ നാടിന്റെ സൂക്ഷിപ്പുകാരനെയും വിശുദ്ധ സെപൽച്ചർ പള്ളിയിൽ പ്രവേശിക്കുന്നതിൽ നിന്ന് തടയുന്നത് അന്താരാഷ്ട്ര കരാറുകളുടെയും കൺവെൻഷനുകളുടെയും നഗ്നമായ ലംഘനമാണെന്ന് മന്ത്രാലയം ചൂണ്ടിക്കാട്ടി. എല്ലാ മതവിഭാഗങ്ങൾക്കും ആരാധനാ സ്വാതന്ത്ര്യം ഉറപ്പാക്കേണ്ടത് അത്യാവശ്യമാണെന്നും കുവൈത്ത് വ്യക്തമാക്കി.

ALSO READ: ദുബൈ തീരത്തെ കുവൈത്ത് എണ്ണക്കപ്പലിന് നേര്‍ക്കുള്ള ആക്രമണം: എണ്ണച്ചോര്‍ച്ചയില്ല, ആര്‍ക്കും പരുക്കില്ല

അൽ-അഖ്സ പള്ളി മുസ് ലിംകൾക്ക് മാത്രമുള്ളതാണെന്ന് കുവൈത്ത് ആവർത്തിച്ചു. നോബൽ സങ്കേതം കൈകാര്യം ചെയ്യുന്നതിനുള്ള നിയമപരമായ അധികാരം ജോർദാനിയൻ ഔഖാഫ് മന്ത്രാലയത്തിനാണെന്നും കുവൈത്ത് ചൂണ്ടിക്കാട്ടി. മതപരമായ സ്ഥലങ്ങളിൽ നടക്കുന്ന ഇത്തരം ലംഘനങ്ങൾക്കെതിരെ അന്താരാഷ്ട്ര സമൂഹവും യുഎൻ സുരക്ഷാ കൗൺസിൽ അംഗങ്ങളും അടിയന്തരമായി ഇടപെടണമെന്ന് കുവൈത്ത് ആവശ്യപ്പെട്ടു.

വിശ്വാസികളെ പ്രകോപിപ്പിക്കുന്നതും അവരുടെ അവകാശങ്ങളെ ദുർബലപ്പെടുത്തുന്നതുമായ നടപടികൾ മേഖലയിൽ വലിയ പ്രത്യാഘാതങ്ങൾ ഉണ്ടാക്കുമെന്ന് പ്രസ്താവനയിൽ മുന്നറിയിപ്പ് നൽകുന്നു. വിശ്വാസികളുടെ അവകാശങ്ങൾ സംരക്ഷിക്കാനും മതപരമായ വിശുദ്ധി നിലനിർത്താനും ലോകരാജ്യങ്ങൾ തങ്ങളുടെ ഉത്തരവാദിത്തങ്ങൾ ഏറ്റെടുക്കണമെന്നും കുവൈത്ത് വിദേശകാര്യ മന്ത്രാലയം ആവശ്യപ്പെട്ടു.

kuwait has strongly condemned israel’s actions imposing restrictions on worship in jerusalem, calling it a violation of religious rights. the statement urged international intervention to protect holy sites and ensure freedom of worship amid rising tensions in the region