തിരുവനന്തപുരം: മന്ത്രി കെ.ബി ഗണേഷ് കുമാറിനെതിരെ ഡി.ജി.പിക്ക് പരാതി. കെ.എസ്.യു സംസ്ഥാന വൈസ് പ്രസിഡന്റ് യദു കൃഷ്ണനാണ് പരാതി നല്‍കിയത്. മന്ത്രിയെ മറ്റൊരു സ്ത്രീയുമായി കാണാന്‍ പറ്റാത്ത സാഹചര്യത്തില്‍ ഭാര്യ കണ്ടുവെന്നും സഹായത്തിനായി 112 ലേക്ക് വിളിച്ച് വിവരം അറിയിച്ചതായും പരാതിയില്‍ പറയുന്നു. എന്നാല്‍ പരാതിയില്‍ തുടര്‍ നടപടികള്‍ ഉണ്ടായില്ലെന്നും സംഭവത്തില്‍ സമഗ്രമായ അന്വേഷണം നടത്തണമെന്നുമാണ് യദു കൃഷ്ണന്റെ ആവശ്യം. 

ഗണേഷ് കുമാറും സ്റ്റാഫും ചേര്‍ന്ന് ഭാര്യ ബിന്ദുവിനെ ആക്രമിച്ചെന്നും പരാതി പറയുന്നുണ്ട്. മന്ത്രിക്കും ബന്ധപ്പെട്ട സ്റ്റാഫിനുമെതിരേ കേസ് രജിസ്റ്റര്‍ ചെയ്ത് അന്വേഷണം നടത്തണമെന്നും യദു കൃഷ്ണന്‍ പരാതിയില്‍ ആവശ്യപ്പെടുന്നു.

ഗണേഷ് കുമാറിനെതിരെ ഗുരുതര ആരോപണവുമായി ഭാര്യ ബിന്ദു മേനോന്‍ രംഗത്തെത്തിയതിന് പിന്നാലെയാണ് കെ.എസ്.യു പരാതിയുമായി രംഗത്തെത്തിയത്. 

മന്ത്രിയെ വാളകത്തെ വീട്ടില്‍ വെച്ച് അതീവ മോശമായ സാഹചര്യത്തില്‍ കണ്ടുവെന്നും ഇതിന്റെ ചിത്രങ്ങള്‍ തന്റെ കൈവശമുണ്ടെന്നും ബിന്ദു മേനോന്‍ വെളിപ്പെടുത്തി. തനിക്ക് 'വട്ടാണെന്ന' മന്ത്രിയുടെ പരിഹാസത്തിന് മറുപടിയായാണ് ബിന്ദു മനസ്സ് തുറന്നത്.

വാളകത്തെ വീട്ടില്‍ മന്ത്രിയെ അസ്വാഭാവിക സാഹചര്യത്തില്‍ കണ്ടു. ഇത് പുറത്തുപറയാന്‍ പോലും കഴിയാത്തത്ര മോശമാണ്. ആ സമയത്ത് എടുത്ത ഫോട്ടോകള്‍ തന്റെ പക്കലുണ്ട് എന്നും ബിന്ദു മേനോന്‍ പറഞ്ഞു. ബിജെപി കൗണ്‍സിലറായ ബന്ധു ശ്രീലേഖയുടെ നിര്‍ദേശപ്രകാരമാണ് പൊലിസ് സഹായം തേടിയത്. എന്നാല്‍ സംഭവസ്ഥലത്തെത്തിയ പൊലിസ്, തങ്ങള്‍ക്ക് ഒന്നും ചെയ്യാനില്ലെന്ന് പറഞ്ഞ് ഒഴിഞ്ഞുമാറുകയായിരുന്നു.

വിവരം പുറത്തറിയാതിരിക്കാന്‍ മന്ത്രിയുടെ സ്റ്റാഫ് അംഗങ്ങള്‍ തന്നെ തടഞ്ഞുവെക്കുകയും സഹായിയായ ശാന്തന്‍ മൊബൈല്‍ ഫോണ്‍ പിടിച്ചുവാങ്ങാന്‍ ശ്രമിക്കുകയും പ്രദീപ് എന്നയാള്‍ വാതില്‍ അടച്ചുപൂട്ടുകയും ചെയ്തതായും ഭാര്യ പറഞ്ഞു. പൊലിസ് എത്തിയതോടെ വീട്ടിലുണ്ടായിരുന്ന സ്ത്രീയെ കാറില്‍ കയറ്റി വിട്ടു. ഇതിന് ശേഷമാണ് ഗണേഷ് കുമാര്‍ മുറിയില്‍ കയറി വാതില്‍ അടച്ചത്.

തനിക്ക് വട്ടാണെന്ന് മന്ത്രി മാധ്യമങ്ങളോട് പറഞ്ഞതുകൊണ്ടാണ് ഇപ്പോള്‍ പ്രതികരിക്കുന്നത്. മുഖ്യമന്ത്രിയുടെ മകളോടും കാര്യങ്ങള്‍ വിശദീകരിച്ചിട്ടുണ്ട്. നിലവില്‍ നിയമനടപടികള്‍ക്ക് ഉദ്ദേശിക്കുന്നില്ല എന്നും ബിന്ദു മേനോന്‍ വെളിപ്പെടുത്തി.

വിവാഹബന്ധത്തില്‍ വര്‍ഷങ്ങളായി പ്രശ്‌നങ്ങള്‍ നിലനില്‍ക്കുന്നുണ്ടെന്ന് ബിന്ദു വെളിപ്പെടുത്തി. 2019-ലും ശ്രീലേഖ പ്രശ്‌നപരിഹാരത്തിനായി ഇടപെട്ടിരുന്നു. മന്ത്രിയായ ശേഷം നിരവധി സ്ത്രീകളുടെ പേരില്‍ തര്‍ക്കങ്ങളുണ്ടായിട്ടുണ്ടെന്നും, ഇതിനെ ചോദ്യം ചെയ്യുമ്പോള്‍ തനിക്ക് സംശയരോഗമാണെന്ന് പറഞ്ഞ് കുറ്റപ്പെടുത്തുകയാണ് ഉണ്ടായതെന്നും അവര്‍ കൂട്ടിച്ചേര്‍ത്തു.

കഴിഞ്ഞ ദിവസം തനിക്കെതിരെ ഉയര്‍ന്ന ആരോപണങ്ങളില്‍ ഗണേഷ് കുമാര്‍ പ്രതികരിച്ചിരുന്നു. 'എനിക്ക് പ്രണയമുണ്ട്, അത് വ്യക്തിപരമായ കാര്യമാണ്. അഞ്ചല്ല, അയ്യായിരം പ്രണയമുണ്ടാകും. വട്ടുള്ളവര്‍ പൊലിസിനെ വിളിക്കട്ടെ' എന്നായിരുന്നു മന്ത്രിയുടെ പരിഹാസം. ഈ പ്രസ്താവനയാണ് ഇപ്പോള്‍ വലിയ രാഷ്ട്രീയ-കുടുംബ തര്‍ക്കങ്ങളിലേക്ക് വഴിമാറിയിരിക്കുന്നത്.

A complaint has been filed with the Director General of Police against Kerala Minister K. B. Ganesh Kumar following recent controversies. The complaint seeks an investigation into the allegations raised against the minister.