കുവൈത്ത് സിറ്റി: തെക്കന്‍ ലെബനനില്‍ ഇസ്രായേല്‍ സൈന്യം നടത്തിയ ആക്രമണങ്ങളെ കുവൈത്ത് ശക്തമായി വിമര്‍ശിച്ചു. ലെബനന്റെ പരമാധികാരത്തെയും പ്രദേശിക സമഗ്രതയെയും ലംഘിക്കുന്ന നടപടികളാണിതെന്നും, അന്താരാഷ്ട്ര നിയമങ്ങള്‍ക്കും മാനുഷിക നിയമങ്ങള്‍ക്കും വിരുദ്ധമാണെന്നും കുവൈത്ത് വിദേശകാര്യ മന്ത്രാലയം പ്രസ്താവനയില്‍ വ്യക്തമാക്കി. ഇതിനകം സംഘര്‍ഷഭരിതമായ സാഹചര്യത്തില്‍ ഇത്തരം ആക്രമണങ്ങള്‍ കൂടുതല്‍ വഷളാക്കാന്‍ ഇടയാക്കുമെന്ന ആശങ്കയും മന്ത്രാലയം രേഖപ്പെടുത്തി.

ലെബനന്റെ അതിര്‍ത്തി പ്രദേശങ്ങളില്‍ സമാധാനവും സ്ഥിരതയും ഉറപ്പാക്കണമെന്ന് ആവശ്യപ്പെടുന്ന ഐക്യരാഷ്ട്രസഭാ സുരക്ഷാ കൗണ്‍സിലിന്റെ പ്രമേയം 1701 നെ അവഗണിച്ചുകൊണ്ടാണ് ഈ ആക്രമണങ്ങള്‍ നടന്നതെന്നും പ്രസ്താവനയില്‍ ചൂണ്ടിക്കാട്ടി. ഈ പ്രമേയത്തിന്റെ അടിസ്ഥാനത്തില്‍ അതിര്‍ത്തി മേഖലയിലെ സമാധാനം നിലനിര്‍ത്തേണ്ടതിന്റെ പ്രാധാന്യം വീണ്ടും ഓര്‍മ്മിപ്പിച്ച കുവൈത്ത്, ബന്ധപ്പെട്ട എല്ലാ പക്ഷങ്ങളും അന്താരാഷ്ട്ര ബാധ്യതകള്‍ കര്‍ശനമായി പാലിക്കണമെന്ന് ആവശ്യപ്പെട്ടു.

ലെബനന്‍ പ്രദേശങ്ങളിലേക്കുള്ള ഇസ്രായേലിന്റെ ആവര്‍ത്തിച്ചുള്ള സൈനിക നടപടികള്‍ അവസാനിപ്പിക്കാന്‍ അന്താരാഷ്ട്ര സമൂഹം ഇടപെടണമെന്ന് കുവൈത്ത് ആവശ്യപ്പെട്ടു. പ്രദേശത്ത് കൂടുതല്‍ സംഘര്‍ഷം ഉണ്ടാകാതിരിക്കാന്‍ അടിയന്തര നടപടികള്‍ സ്വീകരിക്കണമെന്നും, സമാധാനവും സ്ഥിരതയും ഉറപ്പാക്കുന്നതിനായി നയതന്ത്ര ശ്രമങ്ങള്‍ ശക്തമാക്കണമെന്നും മന്ത്രാലയം അഭിപ്രായപ്പെട്ടു.

ലെബനനോടുള്ള കുവൈറ്റിന്റെ ഐക്യദാര്‍ഢ്യം വീണ്ടും ആവര്‍ത്തിച്ച മന്ത്രാലയം, രാജ്യത്തിന്റെ പരമാധികാരവും പ്രദേശിക ഐക്യവും സംരക്ഷിക്കുന്നതിനുള്ള എല്ലാ ശ്രമങ്ങള്‍ക്കും കുവൈത്ത് പിന്തുണ നല്‍കുമെന്ന് അറിയിച്ചു. ലെബനനില്‍ സമാധാനവും സുരക്ഷയും ഉറപ്പാക്കുന്നതിനായി അന്താരാഷ്ട്ര നിയമങ്ങളും പ്രമേയങ്ങളും കര്‍ശനമായി പാലിക്കപ്പെടണം എന്നും പ്രസ്താവനയില്‍ ഊന്നിപ്പറഞ്ഞു.

Kuwait strongly condemned the Israeli military attacks in southern Lebanon, stating that the actions violate Lebanon’s sovereignty and international law. The Foreign Ministry called for respect for UN Security Council Resolution 1701 and urged the international community to act to prevent further escalation.