പാലക്കാട്: മീന്‍ പിടിക്കുന്നതിനിടെയുണ്ടായ തര്‍ക്കത്തെത്തുടര്‍ന്ന് കോളജ് വിദ്യാര്‍ഥിയെ കുത്തിപ്പരിക്കേല്‍പ്പിച്ച കേസിലെ പ്രതിയെ പൊലിസ് പിടികൂടി. കടുക്കാങ്കുന്നം സ്വദേശി കിരണ്‍ രാജിനെയാണ് (33) പാലക്കാട് ടൗണ്‍ നോര്‍ത്ത് പൊലിസ് അറസ്റ്റ് ചെയ്തത്. പാലക്കാട് ചെമ്പൈ സ്മാരക സംഗീത കോളജിലെ ഒന്നാം വര്‍ഷ വിദ്യാര്‍ഥിയും കോഴിക്കോട് സ്വദേശിയുമായ കൗശിക്കിനാണ് ആക്രമണത്തില്‍ പരിക്കേറ്റത്. കഴിഞ്ഞ ദിവസം വൈകിട്ട് ചൂണ്ട ഉപയോഗിച്ച് മീന്‍ പിടിക്കുന്നതിനിടെ ഇരുവരും തമ്മിലുണ്ടായ വാക്കുതര്‍ക്കമാണ് അക്രമത്തില്‍ കലാശിച്ചത്.

സംഭവത്തിന് ശേഷം ഒളിവില്‍ പോയ പ്രതിയെ ജില്ലാ ആശുപത്രി പരിസരത്ത് വച്ചാണ് പൊലിസ് വലയിലാക്കിയത്. പരിക്കേറ്റ കൗശിക് നിലവില്‍ തൃശൂരിലെ സ്വകാര്യ ആശുപത്രിയില്‍ ചികിത്സയിലാണ്. കൗശിക്കിനൊപ്പമുണ്ടായിരുന്ന സുഹൃത്തുക്കളാണ് ഉടന്‍ തന്നെ അദ്ദേഹത്തെ ആദ്യം പാലക്കാട് ജില്ലാ ആശുപത്രിയില്‍ എത്തിച്ചത്.

Palakkad Police arrested 33-year-old Kiran Raj for stabbing a music college student from Kozhikode following a dispute while fishing.