സംസ്ഥാനത്ത് സ്വര്‍ണവില വീണ്ടും കുറഞ്ഞു. ഇന്ന് രാവിലെയും ഉച്ചയ്ക്കുമായി 1640 രൂപയാണ് കുറഞ്ഞത്. രാവിലെ പവന് 360 രൂപ കുറഞ്ഞതിന് പിന്നാലെ ഉച്ചയ്ക്ക് ശേഷം 1280 രൂപ വീണ്ടും കുറയുകയായിരുന്നു. ഇതോടെ, പവന്‍ വില ഈ മാസത്തെ ഏറ്റവും താഴ്ന്ന നിലയായ 1,15,440 രൂപയിലെത്തി. ഗ്രാമിന് 14,430 രൂപയാണ് പുതിയ വില. 

ആഗോളവിപണിയില്‍ സ്വര്‍ണവില 5000 ഡോളറിന് താഴേക്ക് പോയതോടെയാണ് സംസ്ഥാനത്തും വില കുറഞ്ഞത്. നിലവില്‍ ട്രോയ് ഔണ്‍സിന് 4997 ഡോളര്‍ എന്ന നിലയിലാണ് വ്യാപാരം തുടരുന്നത്. വെള്ളി രണ്ട് ശതമാനത്തിലേറെ ഇടിഞ്ഞ് 78.74 ഡോളര്‍ എന്ന നിരക്കിലാണ്.

സാധാരണ നിലക്ക് യുദ്ധ സാഹചര്യത്തില്‍ സുരക്ഷിത നിക്ഷേപമെന്ന നിലയില്‍ സ്വര്‍ണ നിക്ഷേപം വര്‍ധിക്കുന്നതാണ് പതിവ്. എന്നാല്‍ ക്രൂഡ് ഓയില്‍ വിലയും അമേരിക്കന്‍ ഡോളറും കയറാന്‍ തുടങ്ങിയതാണ് ഇക്കുറി തിരിച്ചടിയായതെന്ന് നിരീക്ഷകര്‍ ചൂണ്ടിക്കാട്ടുന്നു.

ഫെബ്രുവരി 28ന് ഇറാനില്‍ യു.എസും ഇസ്‌റാഈലും തീര്‍ത്തും ഏകപക്ഷീയമായി ആക്രമണം നടത്തിയതിന് പിന്നാലെ സ്വര്‍ണവില കുതിച്ചുയര്‍ന്നിരുന്നു. എന്നാല്‍ അതേവേഗതയില്‍ പൊന്ന് തിരിച്ചിറങ്ങി. രാജ്യാന്തര വിപണിയിലെ ട്രെന്‍ഡ് തുടരുകയാണെങ്കില്‍ വില ഇനിയും താഴേക്ക് വരുമെന്നാണ് വ്യാപാരികള്‍ പറയുന്നത്.

കേരളത്തില്‍ ഇന്നത്തെ വിലയില്‍ ഒരു പവന്‍ സ്വര്‍ണാഭരണം വാങ്ങാന്‍ പത്തുശതമാനം പണിക്കൂലി കണക്കാക്കിയാല്‍ 1,32,000 ത്തിനടുത്ത് രൂപയെങ്കിലും വേണ്ടി വരും. മൂന്നു മുതല്‍ മുപ്പതു ശതമാനം വരെയാണ് സാധാരണ പണിക്കൂലി ഈടാക്കുന്നത്. എന്നാല്‍ ആഭരണങ്ങളുടെ ഡിസൈന്‍ അനുസരിച്ച് പണിക്കൂലിയിലും വിലയിലും മാറ്റമുണ്ടാകും. ഇതിന് പുറമെ മൂന്ന് ശതമാനം ജി.എസ്.ടിയും ഹോള്‍മാര്‍ക്കിങ് ചാര്‍ജും കൂടിയാണ് സ്വര്‍ണാഭരണത്തിന്റെ വില കണക്കാക്കുന്നത്.