പാട്‌ന: ബിഹാറില്‍ രാജ്യസഭാ സീറ്റുകളിലേക്കുള്ള തെരഞ്ഞെടുപ്പില്‍ എന്‍ഡിഎ സ്ഥാനാര്‍ഥികള്‍ക്ക് ജയം. ബിഹാര്‍ മുഖ്യമന്ത്രി നിതീഷ് കുമാര്‍, ബിജെപി ദേശീയ പ്രസിഡന്റ് നിതിന്‍ നബിന്‍, കേന്ദ്ര കൃഷിമന്ത്രി രാംനാഥ് താക്കൂര്‍, രാഷ്ട്ര്യീയ ലോക്‌മോര്‍ച അധ്യക്ഷന്‍ ഉപേന്ദ്ര കുശ്വാഹ, മുന്‍ എംഎല്‍എ ശിവേഷ് കുമാര്‍ ഉള്‍പ്പെടെ മുഴുവന്‍ സ്ഥാനാര്‍ഥികളും വിജയിച്ചു. 

എന്‍ഡിഎയുടെ 202 എംഎല്‍എമാര്‍ വോട്ട് ചെയ്തു. എന്നാല്‍ കോണ്‍ഗ്രസിന്റെ മൂന്നും, ആര്‍ജെഡിയുടെ ഒരു എംഎല്‍എയും വോട്ടെടുപ്പില്‍ നിന്ന് വിട്ടുനിന്നു. കോണ്‍ഗ്രസിലെ സുരേന്ദ്ര കുശ്വാഹ, മനോജ് ബിശ്വാസ്, മനോഹര്‍ പ്രസാദ് സിങ് എന്നിവരും, ആര്‍ജെഡി എംഎല്‍എ ഫൈസല്‍ റഹ്‌മാനുമാണ് വിട്ടുനിന്നത്. എംഎല്‍എമാരുടെ മാറി നില്‍ക്കല്‍ പ്രതിപക്ഷത്തിന് തിരിച്ചടിയായി. 

ALSO READ: ഹോര്‍മുസില്‍ ഇടപെടില്ല; ട്രംപിനെ ഞെട്ടിച്ച് സഖ്യ രാഷ്ട്രങ്ങളുടെ നിലപാട്; യുദ്ധത്തില്‍ ഒറ്റപ്പെട്ട് ഇസ്‌റാഈലും, യുഎസും  

ആര്‍ജെഡിയുടെ അമരേന്ദ്ര ദാരി സിങ്ങായിരുന്നു പ്രതിപക്ഷ സ്ഥാനാര്‍ഥി. ബിഹാറില്‍ ഒരു രാജ്യസഭാ സീറ്റ് ജയിക്കാന്‍ 41 എംഎല്‍എമാരുടെ പിന്തുണ മതി. മഹാഗഡ്ബന്ധന്‍ സഖ്യത്തിന്റെ 35ഉം എഐഎം ഐഎമ്മിന്റെ 5ഉം ബിഎസ്പിയുടെ 1 എംഎല്‍എയും വോട്ട് ചെയ്താല്‍ അമരേന്ദ്ര സിങ് ദാരിക്ക് ജയിക്കാമായിരുന്നു. എന്നാല്‍ ആര്‍ജെഡി, എഐഎം ഐഎം, ബിഎസ്പി എംഎല്‍എമാര്‍ സംയുക്ത സ്ഥാനാര്‍ഥിക്ക് വോട്ട് ചെയ്‌തെങ്കിലും വോട്ടെടുപ്പില്‍ നിന്ന് നാല് എംഎല്‍എമാര്‍ വിട്ടുനിന്നതോടെ എന്‍ഡിഎ അനായാസ ജയം നേടുകയായിരുന്നു.