2026 ഐപിഎൽ ഇന്ത്യൻ നായകൻ ശുഭ്മൻ ഗില്ലിന് നിർണായകമായിരിക്കുമെന്ന് തുറന്നു പറഞ്ഞിരിക്കുകയാണ് മുൻ ഇന്ത്യൻ താരം സുബ്രമണ്യം ബദ്രിനാഥ്. ഇന്ത്യൻ ടി-20 ടീമിലേക്ക് തിരിച്ചു വരാൻ ഗില്ലിന്‌ ഐപിഎല്ലിൽ മികച്ച പ്രകടനം തന്നെ നടത്തേണ്ടി വരുമെന്നാണ് ബദ്രിനാഥ് പറഞ്ഞത്. സഞ്ജു സാംസൺ, അഭിഷേക് ശർമ്മ, ഇഷാൻ കിഷൻ, യശ്വസി ജെയ്‌സ്വാൾ എന്നിവർ ഇതിനോടകം തന്നെ ടി-20 ഓപ്പണിങ് റോളിൽ ഉണ്ടെന്നും മുൻ ഇന്ത്യൻ താരം ഗില്ലിനെ ഓർമിപ്പിച്ചു. 

''ഈ ഐപിഎൽ അദ്ദേഹത്തിന് ഒരു വഴിത്തിരിവ് ആയിരിക്കുമെന്ന് ഞാൻ കരുതുന്നു. ഇന്ത്യൻ ടി-20 ടീമിൽ നിന്നും അദ്ദേഹത്തെ ഒഴിവാക്കി. അതുകൊണ്ട് അദ്ദേഹത്തിന് ഇനിയും ഒരുപാട് തെളിയിക്കാൻ ഉണ്ടാവും. അദ്ദേഹം ഏകദിനത്തിലെയും ടെസ്റ്റിലെയും ക്യാപ്റ്റനാണ്. എന്നാൽ ടി-20 ടീമിൽ ഇടം നേടാൻ സാധിക്കില്ല. ലോകകപ്പിന് തൊട്ടുമുമ്പായി ടീമിൽ നിന്നും പുറത്താക്കപ്പെട്ടതിൽ അദ്ദേഹത്തിന് വേദന തോന്നിയേക്കാം. സഞ്ജു സാംസൺ, അഭിഷേക് ശർമ്മ, ഇഷാൻ കിഷൻ, യശ്വസി ജെയ്‌സ്വാൾ എന്നീ താരങ്ങളാൽ ഇന്ത്യൻ ഓപ്പണിങ് ഇപ്പോൾ തന്നെ നിറഞ്ഞിട്ടുണ്ട്. അതിനാൽ ഗിൽ തന്റെ കളി മെച്ചപ്പെടുത്തേണ്ടതുണ്ട്. വരാനിരിക്കുന്ന ഐപിഎല്ലിൽ മികച്ച പ്രകടനം നടത്തിയാൽ മാത്രമേ അദ്ദേഹത്തിന് ഇന്ത്യൻ ടീമിലേക്ക് തിരിച്ചുവരാൻ സാധിക്കൂ'' സുബ്രമണ്യം ബദ്രിനാഥ് സ്റ്റാർ സ്പോർട്സിലൂടെ പറഞ്ഞു. 

ഐപിഎല്ലിൽ ഗുജറാത്ത് ടൈറ്റൻസിന്റെ ആദ്യ മത്സരം മാർച്ച് 31നാണ് നടക്കുന്നത്. കഴിഞ്ഞ സീസണിലെ റണ്ണേഴ്‌സ് അപ്പായ പഞ്ചാബ് കിങ്സാണ് ഗില്ലിന്റെയും സംഘത്തിന്റെയും എതിരാളികൾ. 

ഐപിഎൽ 19ാം സീസണ് മാർച്ച് 28നാണ് തുടക്കമാവുന്നത്. ആദ്യ മത്സരത്തിൽ നിലവിലെ ചാമ്പ്യന്മാരായ റോയൽ ചലഞ്ചേഴ്‌സ് ബെംഗളൂരു സൺറൈസേഴ്‌സ് ഹൈദരാബാദിനെ നേരിടും. ഏപ്രിൽ കേരളം, തമിഴ്നാട്, അസം, പശ്ചിമ ബംഗാൾ എന്നീ സംസ്ഥാനങ്ങളിൽ തെരഞ്ഞെടുപ്പ് നടക്കുന്നതിനാൽ ഐപിഎൽ ഷെഡ്യൂൾ രണ്ട് ഘട്ടങ്ങളിലായാണ് പുറത്തുവിടുക.

തെരഞ്ഞെടുപ്പ് സമയങ്ങളിൽ മത്സരങ്ങൾ സുഖകരമായ രീതിയിൽ നടക്കുന്നതിനും യാത്ര താമസ സൗകര്യങ്ങളിലെ ബുദ്ധിമുട്ടുകൾ ഒഴിവാക്കുന്നതിന് വേണ്ടിയാണ് ഇത്തരത്തിൽ ഷെഡ്യൂൾ തയ്യാറാക്കുന്നത്. ശനി, ഞായർ ദിവസങ്ങളിൽ രണ്ട് വീതം മത്സരങ്ങളും നടക്കും.