പാലക്കാട്; പാലക്കാട് കണ്ണാടിയില്‍ വോട്ടര്‍മാര്‍ക്ക് പണം നല്‍കുന്ന ദൃശ്യങ്ങള്‍ പകര്‍ത്തിയ കോണ്‍ഗ്രസ് പ്രവര്‍ത്തകര്‍ക്കെതിരെ ബിജെപി സ്ഥാനാര്‍ഥി ശോഭ സുരേന്ദ്രന്‍ ഉന്നയിച്ച ആരോപണങ്ങള്‍ തള്ളി കോണ്‍ഗ്രസ്. കാറിലെത്തിയ കോണ്‍ഗ്രസ് സംഘം തനിക്ക് നേരെ അശ്ലീല ആംഗ്യം കാണിച്ചെന്നായിരുന്നു ശോഭയുടെ പരാതി. എന്നാല്‍ ശോഭയോട് മോശമായി പെരുമാറിയിട്ടില്ലെന്നും പണം നല്‍കുന്ന ദൃശ്യങ്ങള്‍ പിടിക്കപ്പെട്ടതിന്റെ ജാള്യത മറക്കാന്‍ ബിജെപി ആരോപണങ്ങളുന്നയിക്കുകയാണെന്നും കോണ്‍ഗ്രസ് പ്രവര്‍ത്തകര്‍ പറഞ്ഞു.

'അവിചാരിതമായാണ് പണം കൊടുക്കുന്നത് കണ്ടത്. നേരത്തെ ഇവരുടെ വാഹനത്തെ ഫോളോ ചെയ്തിരുന്നുവെന്നത് ആരോപണം മാത്രമാണ്. പണം കൊടുക്കുന്നത് കണ്ടപ്പോള്‍ വീഡിയോ എടുത്തു. ഇത് മനസിലായപ്പോഴാണ് ശോഭ അശ്ലീല ആംഗ്യം കാണിച്ചുവെന്ന ആരോപണം ഉയര്‍ത്തുന്നത്. പണം കൊടുത്ത സ്ത്രീ പാലക്കാടുള്ളതല്ലെന്നും കോണ്‍ഗ്രസ് പ്രവര്‍ത്തകര്‍ വ്യക്തമാക്കി. മൂന്ന് ദിവസമായി പിന്തുടരുന്നു എന്ന ആരോപണവും പ്രവര്‍ത്തകര്‍ നിഷേധിച്ചു. കഴിഞ്ഞ മൂന്ന് ദിവസമായി തെരഞ്ഞെടുപ്പ് പ്രചരണ പ്രവര്‍ത്തനങ്ങളുടെ തിരക്കിലായിരുന്നുവെന്നും കോണ്‍ഗ്രസ് പ്രവര്‍ത്തകര്‍ വ്യക്തമാക്കി. 

ALSO READ: 'വോട്ടിന് പണം കൂടാതെ സാരിയും'; ചിത്രങ്ങള്‍ പുറത്ത്, തെരഞ്ഞെടുപ്പ് കമ്മിഷനും പൊലിസ് മേധാവിക്കും പരാതി നല്‍കി കോണ്‍ഗ്രസ്

പാലക്കാട് മണ്ഡലം കേന്ദ്രീകരിച്ച് ശോഭ സുരേന്ദ്രന്റെ നേതൃത്വത്തില്‍ പണവും, സാരിയും വിതരണം ചെയ്‌തെന്ന ആരോപണം നേരത്തെ ഉയര്‍ന്നിരുന്നു. ഇന്ന് ഇതിന്റെ ദൃശ്യങ്ങളടക്കം പുറത്തുവന്നു. അമ്പലങ്ങളില്‍ 50000, മരണ വീടുകളില്‍ 25000 വരെ നല്‍കിയതായി യുഡിഎഫ് പ്രവര്‍ത്തകര്‍ ആരോപിച്ചു.

കണ്ണാടി മേഖലയില്‍ പണം വിതരണം ചെയ്യുന്ന ദൃശ്യങ്ങളാണ് പുറത്തുവന്നത്. ഇതറിഞ്ഞ് സ്ഥലത്തെത്തിയ കോണ്‍ഗ്രസ് പ്രവര്‍ത്തകര്‍ വീഡിയോ പകര്‍ത്തി. ഇതറിഞ്ഞ ശോഭ സുരേന്ദ്രന്‍ കോണ്‍ഗ്രസ് പ്രവര്‍ത്തകരോട് തട്ടികയറുകയും, ഭീഷണിപ്പെടുത്തുകയും ചെയ്യുന്ന ദൃശ്യങ്ങളും പുറത്തുവന്നിട്ടുണ്ട്. 

നേരത്തെ കലാശക്കൊട്ടില്‍ പങ്കെടുക്കുന്നവര്‍ക്കും ബിജെപിയുടെ നേതൃത്വത്തില്‍ പണം വിതരണം ചെയ്തതായി ആരോപണമുയര്‍ന്നിരുന്നു. നിശബ്ദ പ്രചരണ ദിവസമായ ഇന്ന് രാവിലെയോടെയാണ് ശോഭയുടെ നേതൃത്വത്തില്‍ പാവപ്പെട്ടവരുടെ വീടുകള്‍ കേന്ദ്രീകരിച്ച് പണം വിതരണം ചെയ്തത്. ശോഭയോടൊപ്പം വെള്ള സാരി ധരിച്ച മറ്റൊരു സ്ത്രീയുമുണ്ട്. അവരാണ് പണം സൂക്ഷിക്കുകയും വിതരണം ചെയ്യുകയും ചെയ്തതെന്നും യുഡിഎഫ് പ്രവര്‍ത്തകര്‍ പറയുന്നു. 

കോഴ നല്‍കുന്നത് പിടിക്കപ്പെട്ടതോടെ കോണ്‍ഗ്രസ് പ്രവര്‍ത്തകര്‍ക്കെതിരെ ആരോപണം ഉന്നയിച്ച് മുഖം രക്ഷിക്കാനായിരുന്നു ശോഭ സുരേന്ദ്രന്റെ ശ്രമം. കാറിലെത്തിയ കോണ്‍ഗ്രസ് പ്രവര്‍ത്തകര്‍ അശ്ലീല ആംഗ്യം കാണിച്ചെന്നും, അതിനാലാണ് അവരെ തടഞ്ഞതെന്നുമായിരുന്നു ശോഭയുടെ ന്യായീകരണം.

congress workers said they did not misbehave with shobha and alleged that the bjp is making false accusations after being caught distributing money to voters.