കാണ്‍പൂര്‍: പാവപ്പെട്ടവരെ കബിളിപ്പിച്ച് ഉത്തര്‍പ്രദേശിലെ കാണ്‍പൂരില്‍ വൃക്കകള്‍ തട്ടിയെടുത്ത് കോടികള്‍ക്ക് വില്‍ക്കുന്ന വന്‍ അവയവക്കച്ചവട റാക്കറ്റിനെ പൊലിസ് തകര്‍ത്തു.

പന്ത്രണ്ടാം ക്ലാസ് വിദ്യാഭ്യാസം മാത്രമുള്ള രോഹിത് തിവാരി (34) എന്നയാളാണ് ഡോക്ടറായി ചമഞ്ഞ് മുപ്പതോളം ശസ്ത്രക്രിയകള്‍ക്ക് നേതൃത്വം നല്‍കിയത്. സംഭവത്തില്‍ ആശുപത്രി ഉടമകളടക്കം പത്തോളം പേരെ പൊലിസ് അറസ്റ്റ് ചെയ്തു.

ടെലിഗ്രാം വഴി കണ്ടെത്തുന്ന ഇരകള്‍ക്ക് 5 മുതല്‍ 10 ലക്ഷം രൂപ വരെ വാഗ്ദാനം ചെയ്താണ് വൃക്കകള്‍ സംഘടിപ്പിക്കുന്നത്. എന്നാല്‍ ആവശ്യക്കാരില്‍ നിന്ന് 60 ലക്ഷം മുതല്‍ 1 കോടി രൂപ വരെയാണ് ഈ സംഘം ഈടാക്കിയിരുന്നത്.

അമിതാഭ് ബച്ചന്‍ പോലും ഒരു വൃക്കയുമായാണ് ജീവിക്കുന്നത്, എന്നിട്ടും അദ്ദേഹം ഇന്നും സജീവമാണ്- എന്ന് വിശ്വസിപ്പിച്ചാണ് പാവപ്പെട്ടവരെ ഇവര്‍ ശസ്ത്രക്രിയയ്ക്ക് പ്രേരിപ്പിച്ചിരുന്നത്.

മെഡിക്കല്‍ പരിശീലനമില്ലാത്ത രോഹിത് തിവാരി ഓപറേഷന്‍ തിയേറ്ററില്‍ ഏപ്രണ്‍ ധരിച്ചും സ്റ്റെതസ്‌കോപ്പ് ഉപയോഗിച്ചും സര്‍ജറി നടത്തുന്ന ചിത്രങ്ങള്‍ പൊലിസിന് ലഭിച്ചു. ഇയാളുടെ ശസ്ത്രക്രിയയ്ക്ക് വിധേയരായ പലരും മരണപ്പെട്ടിട്ടുണ്ടാകാമെന്ന് പൊലിസ് സംശയിക്കുന്നു.

 അഹൂജ ഹോസ്പിറ്റല്‍, പ്രിയ ഹോസ്പിറ്റല്‍ തുടങ്ങിയ സ്ഥാപനങ്ങളില്‍ യാതൊരു രേഖകളുമില്ലാതെയാണ് ശസ്ത്രക്രിയകള്‍ നടന്നത്. ഉടമകളായ ഡോ. സുര്‍ജിത് അഹൂജ, പ്രീതി അഹൂജ എന്നിവരും പിടിയിലായിട്ടുണ്ട്.

ഡല്‍ഹി, മുംബൈ, കൊല്‍ക്കത്ത, നേപ്പാള്‍ എന്നിവിടങ്ങളിലൊക്കെ വേരുകളുള്ള അന്താരാഷ്ട്ര റാക്കറ്റാണിതെന്ന് പൊലിസ് കണ്ടെത്തി. ഒളിവില്‍ പോയ മറ്റ് പ്രതികള്‍ക്കായി തിരച്ചില്‍ ഊര്‍ജിതമാക്കിയിട്ടുണ്ട്.

Kanpur Police dismantled a major organ trafficking ring where a 34-year-old high school graduate posed as a surgeon and performed 30 illegal kidney transplants, charging recipients up to 1 crore while using Bollywood star Amitabh Bachchan’s health as a deceptive tool to lure poor donors.