വാഷിങ്ടണ്‍: ഇറാനുമായുള്ള രണ്ടാം ഘട്ട ചര്‍ച്ചകള്‍ ഈ വാരാന്ത്യത്തില്‍ നടക്കുമെന്ന് യു.എസ് പ്രസിഡന്റ് ഡൊണാള്‍ഡ് ട്രംപ്. യുദ്ധം ഉടന്‍ അവസാനിക്കുമെന്നും ട്രംപ് കൂട്ടിച്ചേര്‍ത്തു. ഏപ്രില്‍ 21-ന് അവസാനിക്കുന്ന രണ്ടാഴ്ചത്തെ വെടിനിര്‍ത്തല്‍ നീട്ടേണ്ടി വരില്ലെന്നും അതിനുള്ളില്‍ തന്നെ ശാശ്വത പരിഹാരം ഉണ്ടാകുമെന്നാണ് പ്രതീക്ഷിക്കുന്നതെന്നും യു.എസ് പ്രസിഡന്റ് പറഞ്ഞു. ഇസ്ലാമാബാദില്‍ നടന്ന ആദ്യഘട്ട ചര്‍ച്ചകള്‍ പരാജയപ്പെട്ട് ഒരാഴ്ച പിന്നിടുമ്പോഴാണ് പുതിയ നീക്കവുമായി ട്രംപ് രംഗത്തെത്തിയിരിക്കുന്നത്. ഇറാന് കരാറില്‍ താല്‍പര്യമുണ്ടെന്നാണ് ട്രംപ് പറയുന്നത്. 

ALSO READ: 'ഒട്ടകം പരുത്തിക്കുരു സ്വപ്നം കാണുന്നു'; ട്രംപിന്റെ 'സൗജന്യ എണ്ണ' വാഗ്ദാനത്തെ പരിഹസിച്ച് ഇറാൻ

'ഇറാന് കരാറില്‍ താല്‍പ്പര്യമുണ്ട്, ഞങ്ങള്‍ അവരുമായി നല്ല രീതിയിലാണ് സംസാരിക്കുന്നത്' -ട്രംപ് അവകാശപ്പെട്ടു. കരാര്‍ ഒപ്പിടുകയാണെങ്കില്‍ താന്‍ പാകിസ്താനിലേക്ക് പോകാന്‍ തയാറാണെന്നും അദ്ദേഹം കൂട്ടിച്ചേര്‍ത്തു. ഹോര്‍മുസ് കടലിടുക്കില്‍ ഉപരോധം ഏര്‍പെടുത്തിയത് ഇറാനെ ചര്‍ച്ചയിലേക്ക് എത്തിക്കുന്നതില്‍ വലിയ പങ്കുവഹിച്ചെന്നും യു.എസ് പ്രസിഡന്റ് അവകാശപ്പെടുന്നു. 

ALSO READ: സമാധാനത്തിന് രണ്ട് ഉപാധികൾ; ട്രംപിനെ വെല്ലുവിളിച്ച് ഇറാൻ, ഹോർമുസ് തുറക്കണമെന്ന് ആവശ്യം

അതേസമയം, സമാധാന ചര്‍ച്ചകള്‍ക്കിടയിലും ഇറാനെതിരെ അമേരിക്കയും ഇസ്‌റാഈലും കടുത്ത ഭീഷണി തുടരുന്നുണ്ട്. ഇറാന്‍ ആണവായുധം നിര്‍മിക്കാന്‍ പാടില്ല എന്നതാണ്  'റെഡ് ലൈന്‍' എന്ന് ട്രംപ് ആവര്‍ത്തിക്കുന്നു. ഇറാന്റെ സമ്പുഷ്ടീകരിച്ച യുറേനിയം ശേഖരം വിട്ടുകൊടുക്കാന്‍ അവര്‍ തയാറായെന്നും ട്രംപ് അവകാശപ്പെടുന്നുണ്ട്. എന്നാല്‍ ഇറാന്‍ ഇത് ഔദ്യോഗികമായി സ്ഥിരീകരിച്ചിട്ടില്ല.

donald trump reiterates that the war will end soon and suggests possible negotiations with iran, drawing attention to shifting geopolitical signals