തൃശൂര്‍: ചെറുതുരുത്തിയില്‍ കുഴഞ്ഞുവീണു മരിച്ച ഒന്നാം ക്ലാസുകാരിയുടെ മരണം പേവിഷബാധയെത്തുടര്‍ന്നാണെന്ന് ആരോഗ്യവകുപ്പ് സ്ഥിരീകരിച്ചു. വെട്ടിക്കാട്ടിരി സ്‌കൂളിലെ വിദ്യാര്‍ഥിനിയായ സന്‍ഹ മെഹ്‌റിന്‍ ആണ് മരിച്ചത്. കഴിഞ്ഞ മാസം 28ാം തിയതിയായിരുന്നു നാടിനെ നടുക്കിയ സംഭവം നടന്നത്.

ബന്ധുവീട്ടിലേക്ക് പോകുന്നതിനിടെ കുട്ടി പെട്ടെന്ന് കുഴഞ്ഞു വീഴുകയായിരുന്നു. ആശുപത്രിയില്‍ എത്തിക്കുന്നതിന് മുന്‍പ് തന്നെ കുട്ടി വെള്ളത്തിനോട് കടുത്ത വിരക്തി പ്രകടിപ്പിക്കുകയും വായില്‍ നിന്ന് നുരയും പതയും വരികയും ചെയ്തതായി ദൃക്‌സാക്ഷികള്‍ പറഞ്ഞു.

പേവിഷബാധയുടെ ലക്ഷണങ്ങള്‍ പ്രകടമായതിനെ തുടര്‍ന്ന് നടത്തിയ വിശദമായ പരിശോധനയിലാണ് മരണം റാബിസ് ബാധ മൂലമാണെന്ന് ആരോഗ്യവകുപ്പ് അധികൃതര്‍ ഉറപ്പിച്ചത്. അപ്രതീക്ഷിതമായുണ്ടായ കുട്ടിയുടെ മരണം പ്രദേശവാസികളെയും സ്‌കൂള്‍ അധികൃതരെയും വലിയ ദുഃഖത്തിലാഴ്ത്തിയിരിക്കുകയാണ്.

Health officials confirmed that the sudden death of a first-grade girl in Thrissur was caused by rabies after she exhibited symptoms like hydrophobia.