കണ്ണൂര്‍: തെരഞ്ഞെടുപ്പ് ഫലം വന്ന് ഒമ്പതു ദിവസമായിട്ടും മുഖ്യമന്ത്രിയെ പ്രഖ്യാപിക്കാനാവാതെ കോണ്‍ഗ്രസ് വിയര്‍ക്കുമ്പോള്‍ എല്‍.ഡി.എഫില്‍ പ്രതിപക്ഷ ഉപനേതാവിനെ ചൊല്ലി തര്‍ക്കം മുറുകുന്നു. ഉപനേതൃപദവിക്ക് സി.പി.ഐ അവകാശമുന്നയിച്ചതാണ് സി.പി.എമ്മിനെ ചൊടിപ്പിച്ചത്. പ്രതിപക്ഷനേതാവിന്റെ കാര്യത്തില്‍ തീരുമാനമാകുന്നതിനു മുമ്പാണ് ഉപനേതാവിനായി സി.പി.ഐ അവകാശവാദവുമായെത്തിയത്. 

പ്രതിപക്ഷനേതൃസ്ഥാനത്തേക്ക് പിണറായി വിജയന്റെ പേരിനാണ് പ്രാമുഖ്യമെങ്കിലും ഡല്‍ഹിയിലെ രണ്ടുദിവസത്തെ പി.ബി യോഗത്തില്‍ ഇക്കാര്യം ചര്‍ച്ചയായില്ല. ഇന്നലത്തെ സംസ്ഥാന സെക്രട്ടേറിയറ്റിലും നേതൃപദവി സംബന്ധിച്ച ചര്‍ച്ചയുയര്‍ന്നില്ലെന്നറിയുന്നു. ഇന്നും നാളെയും നടക്കുന്ന സി.പി.എം സംസ്ഥാന സമിതിയില്‍ പ്രതിപക്ഷനേതാവിനെയും ഉപനേതാവിനെയും തീരുമാനിക്കാനാണ് സാധ്യത. 

കോണ്‍ഗ്രസ് മുഖ്യമന്ത്രിയെ പ്രഖ്യാപിച്ചതിനു പിന്നാലെ പ്രതിപക്ഷനേതാവിനെയും ഉപനേതാവിനെയും സി.പി.എമ്മും പ്രഖ്യാപിക്കും. പിണറായി വിജയന്‍ പ്രതിപക്ഷനേതാവാകട്ടെ എന്നതാണ് സി.പി.എം നേതൃത്വത്തിന്റെ തീരുമാനമെന്നറിയുന്നു. ഉപനേതാവായി കെ.എന്‍ ബാലഗോപാലിന്റെ പേരും ഉയരുന്നുണ്ട്. അതിനിടെയാണ് ഉപനേതൃപദവിക്കായി സി.പി.ഐ സംസ്ഥാന സെക്രട്ടറി ബിനോയ് വിശ്വം അവകാശവാദമുന്നയിച്ചത്. ഇത്തരം അവകാശവാദങ്ങള്‍ മുന്നണിയിലാണ് പറയേണ്ടതെന്നും പരസ്യപ്രതികരണം ശരിയായ രീതിയല്ലെന്നും എല്‍.ഡി.എഫ് കണ്‍വീനര്‍ ടി.പി രാമകൃഷ്ണന്‍ ഓര്‍മിപ്പിച്ചു. കഴിഞ്ഞദിവസത്തെ മുന്നണിയോഗത്തില്‍ ഇതുസംബന്ധിച്ച ചര്‍ച്ച നടന്നില്ലെന്നും അദ്ദേഹം വ്യക്തമാക്കി. 

സി.പി.ഐയുടെ അവകാശവാദത്തെക്കുറിച്ച് അറിയില്ലെന്നായിരുന്നു സി.പി.എം ജനറല്‍ സെക്രട്ടറി എം.എ ബേബിയുടെ പ്രതികരണം. ഇത്തരം ചര്‍ച്ചകള്‍ക്കു തന്നെ പ്രസക്തിയില്ലെന്നും ബേബി വ്യക്തമാക്കി.

ഉപനേതാവിനായുള്ള സി.പി.ഐയുടെ അവകാശവാദത്തില്‍ കടുത്ത അതൃപ്തിയിലാണ് സി.പി.എം നേതൃത്വം. ഉപനേതൃപദവി ഘടകകക്ഷികള്‍ക്കു നല്‍കുന്ന കീഴ്‌വഴക്കം ഇല്ലെന്നും സി.പി.എം നേതാക്കള്‍ പറയുന്നു. 

2011ല്‍ വി.എസ് അച്യുതാനന്ദന്‍ പ്രതിപക്ഷനേതാവായിരുന്നപ്പോള്‍ കോടിയേരി ബാലകൃഷ്ണനെയാണ് ഉപനേതാവാക്കിയത്. 15 എം.എല്‍.എമാര്‍ ഉണ്ടായിരുന്നിട്ടും അന്നൊന്നുമില്ലാത്ത വാദവുമായി ഇപ്പോള്‍ സി.പി.ഐ എത്തുന്നതിലാണ് സി.പി.എമ്മിന് അമര്‍ഷം. തെരഞ്ഞെടുപ്പു തോല്‍വിയില്‍ സി.പി.എമ്മിനെ മാത്രം പഴിക്കുന്ന വിധത്തിലാണ് ബിനോയ് വിശ്വത്തിന്റെ പരാമര്‍ശങ്ങളില്‍ എന്നതും സി.പി.എമ്മിനെ ചൊടിപ്പിക്കുന്നു. ആശാസമരത്തിലും പി.എം ശ്രീ വിഷയത്തിലും മുഖ്യമന്ത്രിയെ പ്രതിരോധത്തിലാക്കുന്ന പ്രസ്താവനകളാണ് കഴിഞ്ഞദിവസങ്ങളില്‍ അദ്ദേഹത്തില്‍നിന്നുണ്ടായത്.