ആലപ്പുഴ: കനത്ത മഴയെ തുടര്‍ന്ന് ഓടയിലെ മലിനജലത്തില്‍ വീണ് യുവാവ് മരിച്ചു. ചാത്തനാട് സ്വദേശി ബോബച്ചന്‍ തങ്കച്ചനാണ് ദാരുണമായി മരണപ്പെട്ടത്.

ഇന്നലെ രാത്രി പ്രദേശത്ത് പെയ്ത ശക്തമായ മഴയ്ക്കിടെ നടന്നുപോകുന്നതിനിടെ കാല്‍ വഴുതി ഓടയിലേക്ക് വീണതാണെന്നാണ് പ്രാഥമിക നിഗമനം. രാത്രിയായതിനാലും കനത്ത മഴ തുടരുന്നതിനാലും അപകടം ആരുടെയും ശ്രദ്ധയില്‍പ്പെട്ടിരുന്നില്ല.   ALSO READ: വാതിലില്‍ വൈദ്യുതി കടത്തിവിട്ട് വീട്ടുകാരെ കൊലപ്പെടുത്താന്‍ ശ്രമം; അന്വേഷണം  

ഇന്ന് രാവിലെയാണ് ഓടയില്‍ മൃതദേഹം കിടക്കുന്നതായി നാട്ടുകാര്‍ കണ്ടെത്തിയത്. ഓടയ്ക്ക് കൈവരിയോ സ്ലാബോ ഇല്ലാതിരുന്നതും അപകടത്തിന് കാരണമായെന്നാണ് നാട്ടുകാരുടെ ആരോപണം.

വിവരമറിഞ്ഞെത്തിയ പൊലീസും അഗ്‌നിരക്ഷാസേനയും ചേര്‍ന്ന് മൃതദേഹം പുറത്തെടുത്തു. ഇന്‍ക്വസ്റ്റ് നടപടികള്‍ക്ക് ശേഷം മൃതദേഹം പോസ്റ്റ്‌മോര്‍ട്ടത്തിനായി ജനറല്‍ ആശുപത്രി മോര്‍ച്ചറിയിലേക്ക് മാറ്റി.