കൊല്ലം: മുസ്‌ലിം ലീഗിനെ വീണ്ടും കടന്നാക്രമിച്ച് എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. ലീഗ് കടുത്ത ഹിന്ദുവിരുദ്ധ നിലപാടിലേക്ക് മാറിയെന്നാണ് ' മലബാര്‍ കലാപവും മാറാടും മറക്കില്ലെന്ന' തലക്കെട്ടില്‍ എഴുതിയ എസ്.എന്‍.ഡി.പി മുഖപത്രമായ യോഗനാദത്തിലെ മുഖപ്രസംഗത്തില്‍ വിമര്‍ശനം. 

അധികാരമേല്‍ക്കും മുമ്പ് മുസ് ലിം ലീഗ് കേരളം ഭരിച്ചു തുടങ്ങിയെന്നും, ലീഗിന്റെ മുഖ്യശത്രുക്കള്‍ സുകുമാരന്‍ നായരും താനുമാണെന്നും വെള്ളാപ്പള്ളി മുഖപത്രത്തില്‍ പറയുന്നു. കെ.എം ഷാജിയെ മന്ത്രിയാക്കാനുള്ള ചര്‍ച്ചകളെയും വെള്ളാപ്പള്ളി വിമര്‍ശിക്കുന്നു. കെ.എം ഷാജിയെ മന്ത്രിയാക്കിയാല്‍ മതസൗഹാര്‍ദ്ദം പൂത്തുലയുമെന്നാണ് ലീഗ് കരുതുന്നത്. ലീഗിനെ എതിര്‍ക്കുന്നവരെ മുസ് ലിം വിരുദ്ധരാക്കി. തന്നെ തെരുവില്‍ അധിക്ഷേപിച്ചുവെന്നും ലേഖനത്തില്‍ പറയുന്നു. 

ലീഗ് അഭിനയിക്കുന്ന മതേതരം കപടനാടകമാണെന്നാണ്  മറ്റൊരു വിമര്‍ശനം. ഹിന്ദുക്കളെ കൊന്നു തള്ളിയ മലബാര്‍ കലാപം നടന്ന നാട്ടിലാണ് ലീഗ് വളര്‍ന്നു പന്തലിച്ചത്. കൂട്ടക്കൊലയെ സ്വാതന്ത്ര്യ സമരമാക്കി മാറ്റിയ തന്ത്രം ഇനി വിലപ്പോവില്ല. മാറാട് കലാപത്തിന് പിന്നിലെ കൈകള്‍ ആരുടേതെന്ന് നന്നായി അറിയാം. സമുദായത്തെ തകര്‍ക്കാന്‍ ഏത് കൊലകൊമ്പന്‍ വന്നാലും കൈകാര്യം ചെയ്യുമെന്നും വെളളാപ്പള്ളി പറയുന്നു. കേരളത്തിന് പുറത്തും അകത്തും എസ്.എന്‍.ഡി.പിക്കും എന്‍.എസ്.എസിനുമെതിരെ നടക്കുന്ന പ്രതിഷേധങ്ങള്‍ തന്റെ വാക്കുകളെ സാധൂകരിക്കുന്നതാണെന്നും വെള്ളാപ്പള്ളി പറയുന്നു. 

മുസ്‌ലിം ലീഗിനെതിരെ അടിക്കടി പ്രസ്താവനകള്‍ ഇറക്കുന്ന വെള്ളാപ്പള്ളിയുടെ വാക്കുകള്‍ മുന്‍പും വിവാദമായിട്ടുണ്ട്. 

SNDP Yogam general secretary Vellappally Natesan has once again launched a sharp criticism against the Indian Union Muslim League, stating that incidents such as the Marad violence and the Malabar riots cannot be forgotten.