കൊച്ചി: നാട്ടിലെത്തുന്ന പ്രവാസികളും വിനോദസഞ്ചാരികളും യാത്രകള്‍ക്കായി വാഹനങ്ങള്‍ വാടകയ്‌ക്കെടുക്കുമ്പോള്‍ അതീവ ജാഗ്രത പാലിക്കണമെന്ന് മോട്ടോര്‍ വാഹന വകുപ്പിന്റെ (MVD) മുന്നറിയിപ്പ്. കൃത്യമായ നിയമസാധുതയില്ലാത്ത വാഹനങ്ങള്‍ വാടകയ്‌ക്കെടുക്കുന്നത് നിങ്ങളെ വലിയ നിയമപ്രശ്‌നങ്ങളിലേക്ക് എത്തിച്ചേക്കാം.

പലയിടങ്ങളിലും സാധാരണ വെള്ള പ്ലേറ്റിലുള്ള (white board) സ്വകാര്യ വാഹനങ്ങള്‍ നിയമവിരുദ്ധമായി വാടകയ്ക്ക് നല്‍കുന്നതായി ശ്രദ്ധയില്‍പ്പെട്ടിട്ടുണ്ട്. ഇത്തരം വാഹനങ്ങള്‍ അപകടത്തില്‍പ്പെട്ടാല്‍ ഇന്‍ഷുറന്‍സ് പരിരക്ഷ ലഭിക്കില്ലെന്ന് മാത്രമല്ല, വാടകയ്‌ക്കെടുത്തവര്‍ കടുത്ത നിയമനടപടികള്‍ നേരിടേണ്ടി വരികയും ചെയ്യും.

എങ്ങനെ തിരിച്ചറിയാം നിയമാനുസൃതമായ വാടക വാഹനങ്ങള്‍?

ഒരു സാധാരണക്കാരന് എളുപ്പത്തില്‍ തിരിച്ചറിയാന്‍ സാധിക്കുന്ന വ്യത്യാസം വാഹനങ്ങളുടെ നമ്പര്‍ പ്ലേറ്റിലാണ് ഉള്ളത്.

കറുത്ത പ്ലേറ്റില്‍ മഞ്ഞ അക്ഷരങ്ങള്‍- നിയമാനുസൃതമായി വാടകയ്ക്ക് നല്‍കുന്ന വാഹനങ്ങള്‍ക്ക് (Rent a Car) കറുത്ത പ്ലേറ്റില്‍ മഞ്ഞ നിറത്തിലുള്ള അക്ഷരങ്ങളായിരിക്കും ഉണ്ടാവുക.

കേന്ദ്ര മോട്ടോര്‍ വാഹന നിയമം- സെക്ഷന്‍ 75 പ്രകാരമുള്ള 'റെന്റ് എ ക്യാബ്' സ്‌കീം അനുസരിച്ചാണ് ഇത്തരം വാഹനങ്ങള്‍ക്ക് ലൈസന്‍സ് നല്‍കുന്നത്. ഇന്ത്യയിലുടനീളം ഈ നിയമം ബാധകമാണ്.

നിലവില്‍ കേരളത്തില്‍ അംഗീകാരമുള്ള പതിമൂന്നിലധികം സ്ഥാപനങ്ങളിലായി പതിനായിരത്തിലേറെ നിയമവിധേയമായ വാടക വാഹനങ്ങള്‍ ലഭ്യമാണ്. അതിനാല്‍ സുരക്ഷിതമായ യാത്രയ്ക്കായി ലൈസന്‍സുള്ള ഏജന്‍സികളെ മാത്രം ആശ്രയിക്കാന്‍ പൊതുജനങ്ങള്‍ ശ്രദ്ധിക്കണമെന്ന് MVD ഫേസ്ബുക്ക് കുറിപ്പിലൂടെ ഓര്‍മ്മിപ്പിച്ചു.

The Motor Vehicles Department has warned travelers against renting private white-board vehicles, emphasizing that only legal rental cars with black number plates and yellow lettering should be used to avoid insurance and legal issues.