കൊച്ചി:  മോഡലിങ്ങിന്റെ പേരില്‍ യുവതികളെ ദുബൈയിലേക്ക് കടത്തിയ കേസിലെ പ്രതി സിന്ധുവിനെ പൊലിസ് അറസ്റ്റ് ചെയ്തു. ജൂണ്‍ 4 വരെ 
റിമാന്‍ഡ് ചെയ്തതായി എറണാകുളം ഒന്നാം ക്ലാസ് മജിസ്‌ട്രേറ്റ് കോടതി ഉത്തരവിട്ടു. താന്‍ ഹൃദ്രോഗിയാണെന്ന് സിന്ധു കോടതിയെ അറിയിച്ചു. ജാമ്യാപേക്ഷ നാളെ സമര്‍പ്പിക്കുമെന്ന് അഭിഭാഷകന്‍ വ്യക്തമാക്കി.

കേസില്‍ ആകെ അഞ്ച് പ്രതികളാണുള്ളത്. തിരുവനന്തപുരം സ്വദേശിനിയായ അലീന (29)യാണ് അറസ്റ്റിലായ മറ്റൊരു പ്രതി. ഷംല, മഞ്ജിമ, റഹ്മത്ത് എന്നിവരാണ് മറ്റ് പ്രതികള്‍.

മോഡലിങ് ജോലി വാഗ്ദാനം ചെയ്ത് യുവതികളെ ദുബൈയിലെത്തിച്ച് അനാശാസ്യ പ്രവര്‍ത്തനങ്ങള്‍ക്ക് ഉപയോഗിച്ചിരുന്ന സംഘത്തില്‍പ്പെട്ടവരാണ് ഇരുവരും.പരാതിയുടെ അടിസ്ഥാനത്തില്‍ നടത്തിയ അന്വേഷണത്തില്‍ അലീനയെ മരടില്‍ നിന്നും സിന്ധുവിനെ മുംബൈയില്‍ നിന്നുമാണ് പിടികൂടിയത്.

മോഹനവാഗ്ദാനങ്ങള്‍ നല്‍കി കെണിയില്‍വീഴ്ത്തിയാണ് ഇവര്‍ യുവതികളെ ചൂഷണത്തിന് ഇരയാക്കിയിരുന്നത്. ദുബൈയിലെ രഹസ്യ കേന്ദ്രങ്ങളില്‍ പാര്‍പ്പിച്ച ശേഷം മയക്കുമരുന്ന് നല്‍കി ചൂഷണത്തിന് ഇരയാക്കിയതായും അന്വേഷണത്തില്‍ കണ്ടെത്തി. നിരവധി പെണ്‍കുട്ടികള്‍ സംഘത്തിന്റെ വലയിലായിട്ടുണ്ടെന്നാണ് സൂചന.

അലീനയ്ക്ക് മുന്‍പും ക്രിമിനല്‍ കേസുകളിലെ ബന്ധമുണ്ടെന്ന് പൊലിസ് അറിയിച്ചു. കഴിഞ്ഞ നവംബറില്‍ വൈറ്റിലയിലെ ബാറില്‍ നടന്ന സംഘര്‍ഷക്കേസിലും അവര്‍ പ്രതിയാണ്. ഗുണ്ടാസംഘങ്ങളുമായും ക്വട്ടേഷന്‍ സംഘങ്ങളുമായും ഇവര്‍ക്ക് ബന്ധമുണ്ടെന്ന വിവരവും പുറത്തുവന്നിട്ടുണ്ട്.