തൃശ്ശൂര്‍: ആഗോള യുദ്ധസാഹചര്യങ്ങളുടെ പ്രതിഫലനമായി രാജ്യത്ത് വിപണിയിലുള്ള മുന്നൂറ്റമ്പതിലധികം അവശ്യമരുന്നുകളുടെ വില ഉടന്‍ വര്‍ധിക്കും. നിലവില്‍ സര്‍ക്കാര്‍ വിലനിയന്ത്രണമേര്‍പ്പെടുത്തിയിട്ടുള്ള 384 ഇനം മരുന്നുകള്‍ക്കാണ് 10 മുതല്‍ 20 ശതമാനം വരെ താത്കാലിക വിലവര്‍ധനവിന് വഴിതുറക്കുന്നത്.

പശ്ചിമേഷ്യന്‍ മേഖലയിലെ ആഭ്യന്തര സംഘര്‍ഷങ്ങളെ തുടര്‍ന്ന് ഔഷധ നിര്‍മ്മാണത്തിന് ആവശ്യമായ പ്രൊപ്പലീന്‍, അമോണിയ, മെത്തനോള്‍ തുടങ്ങിയ അസംസ്‌കൃത വസ്തുക്കളുടെ വില കുതിച്ചുയരുന്നതാണ് ഈ സാഹചര്യം സൃഷ്ടിച്ചത്.

ദൈനംദിന ജീവിതത്തില്‍ സാധാരണക്കാര്‍ ഏറ്റവുമധികം ഉപയോഗിക്കുന്ന പാരസീറ്റമോളിന് പുറമെ അമോക്‌സിസിലിന്‍, അസിത്രോമൈസിന്‍, അംലോഡിപിന്‍, അറ്റോര്‍വസ്റ്റാറ്റിന്‍, ഡെക്‌സാമെതസോണ്‍, അസ്‌കോര്‍ബിക് ആസിഡ് തുടങ്ങിയ ഒട്ടനവധി നിര്‍ണായക മരുന്നുകള്‍ക്ക് ഇതോടെ വിലകൂടും. യുദ്ധ പശ്ചാത്തലത്തില്‍ അസംസ്‌കൃത വസ്തുക്കളുടെ വിലയില്‍ 200 ശതമാനം വരെ വര്‍ധനവുണ്ടായതായും പാക്കിങ്, ഗതാഗത ചെലവുകള്‍ ഇരട്ടിച്ചതായും നിര്‍മ്മാതാക്കള്‍ ചൂണ്ടിക്കാണിക്കുന്നു.

ഇതേതുടര്‍ന്ന് മരുന്നുവില നിയന്ത്രണ നിയമത്തില്‍ ഇളവ് തേടി ഇന്ത്യന്‍ ഡ്രഗ്‌സ് മാനുഫാക്ചറിങ് അസോസിയേഷന്‍ സര്‍ക്കാരിനെ സമീപിച്ചിരുന്നു. നിലവില്‍ ദേശീയ ഔഷധവില നിയന്ത്രണ സമിതിയും ഔഷധവാണിജ്യ മന്ത്രാലയങ്ങളും തമ്മിലുള്ള ചര്‍ച്ചകള്‍ അവസാന ഘട്ടത്തിലാണ്.

അവശ്യമരുന്നുകളുടെ ക്ഷാമം ഒഴിവാക്കാന്‍ വില കൂട്ടുകയല്ലാതെ മറ്റു മാര്‍ഗമില്ലെന്നാണ് അധികൃതരുടെ വിലയിരുത്തല്‍. എങ്കിലും സാഹചര്യം അനുകൂലമാകുമ്പോള്‍ പഴയ നിരക്കിലേക്ക് മടങ്ങാന്‍ കഴിയുന്ന രീതിയിലുള്ള ഒറ്റത്തവണ വില വര്‍ധനവായിരിക്കും നടപ്പാക്കുക. രാജ്യത്ത് പാരസീറ്റമോള്‍ എന്ന ഒരൊറ്റ മരുന്ന് മാത്രം ആയിരത്തി ഇരുനൂറിലധികം ബ്രാന്‍ഡുകളില്‍ ലഭ്യമാണ്. അതുകൊണ്ടുതന്നെ സ്ഥിരമായി മരുന്ന് കഴിക്കുന്ന ലക്ഷക്കണക്കിന് രോഗികള്‍ക്ക് പുതിയ തീരുമാനം കടുത്ത സാമ്പത്തിക ബാധ്യതയാകും.

Prices of 384 essential medicines, including paracetamol, are expected to rise by 10 to 20% due to the surging cost of raw materials caused by the ongoing West Asia conflict.