കോഴിക്കോട്: മൂന്ന് കിലോയോളം എം.ഡി.എം.എ പിടികൂടിയ കേസിലെ മുഖ്യപ്രതി പൊലിസ് കസ്റ്റഡിയില്‍ നിന്ന് രക്ഷപ്പെട്ടു. മുക്കം പൂളപ്പൊയില്‍ സ്വദേശി മുഹമ്മദ് ഹനീഫയാണ് ട്രെയിനില്‍ നിന്ന് ചാടി രക്ഷപ്പെട്ടത്. ഗുജറാത്തിലെ വടോദരയ്ക്ക് സമീപത്തുനിന്നാണ് ഓടുന്ന ട്രെയിനില്‍ നിന്ന് പ്രതി ചാടി രക്ഷപ്പെട്ടത്. 

കൂടുതല്‍ അന്വേഷണത്തിന്റെയും തെളിവെടുപ്പിന്റെയും ഭാഗമായി പ്രതിയെ ഡല്‍ഹിയിലേക്ക് കൊണ്ടുപോകുന്നതിനിടെയാണ് സംഭവം. മുക്കം പൊലിസ് സ്റ്റേഷന്‍ ഉദ്യോഗസ്ഥരും ഡാന്‍സാഫ് സംഘാംഗങ്ങളും ചേര്‍ന്നാണ് പ്രതിയെ കഴിഞ്ഞ ദിവസം രാജധാനി എക്സ്പ്രസില്‍ ഡല്‍ഹിയിലേക്ക് കൊണ്ടുപോയത്. പ്രതിക്കായി പൊലിസ് അന്വേഷണം ആരംഭിച്ചു.

കൈവിലങ് അണിഞ്ഞിരുന്ന പ്രതി ട്രെയിനില്‍ നിന്ന് പുറത്തേക്ക് ചാടുകയായിരുന്നു. ട്രെയിനിനകത്തും പരിസരങ്ങളിലും തിരച്ചില്‍ നടത്തിയെങ്കിലും ഹനീഫയെ കണ്ടെത്താനായില്ല.

കഴിഞ്ഞ ഏപ്രില്‍ രണ്ടിനാണ് മുഹമ്മദ് ഹനീഫ എം.ഡി.എം.എയുമായി പിടിയിലായത്. മുക്കത്ത് രണ്ടിടങ്ങളില്‍ നിന്നായി 2.803 കിലോഗ്രാം എം.ഡി.എം.എ പിടികൂടിയ കേസിലെ മുഖ്യപ്രതിയാണ് ഇയാള്‍.

ഡല്‍ഹിയില്‍ നിന്നും ബംഗളുരുവില്‍ നിന്നുമാണ് കേരളത്തിലേക്ക് ലഹരിമരുന്ന് എത്തിച്ചിരുന്നതെന്ന് ഇയാള്‍ മൊഴി നല്‍കിയിരുന്നു. കേസുമായി ബന്ധപ്പെട്ട് ഹനീഫയുടെ ഒപ്പമുണ്ടായിരുന്ന ഒരു സ്ത്രീയെയും പൊലിസ് അറസ്റ്റ് ചെയ്തിരുന്നു.പ്രാദേശിക പൊലിസിന്റെ സഹായത്തോടെ പ്രതിയെ കണ്ടെത്താനുള്ള അന്വേഷണം ഊര്‍ജിതമാക്കിയതായി പൊലിസ് അറിയിച്ചു.

The main accused in a narcotics case escaped from a train while being transported, prompting police to launch an intensified search operation. Authorities have deployed multiple teams to trace the suspect and investigate the circumstances that led to the escape.