മസ്‌കത്ത്: നാല്‍പത്തഞ്ച് വര്‍ഷങ്ങള്‍ക്ക് മുന്‍പ് ആറു ഗള്‍ഫ് രാജ്യങ്ങള്‍ ചേര്‍ന്ന് രൂപം നല്‍കിയ ഗള്‍ഫ് സഹകരണ കൗണ്‍സില്‍ (ജി.സി.സി) ഇന്ന് ലോക സമ്പദ്‌വ്യവസ്ഥയില്‍ ശക്തമായ സാന്നിധ്യമായി മാറിയിരിക്കുകയാണ്. 1981 മെയ് 25ന് സൗദി അറേബ്യ, യു.എ.ഇ, ഒമാന്‍, ബഹ്‌റൈന്‍, ഖത്തര്‍, കുവൈത്ത് എന്നീ രാജ്യങ്ങള്‍ ചേര്‍ന്നാണ് ജി.സി.സി രൂപീകരിച്ചത്. സാമ്പത്തിക സഹകരണം, സുരക്ഷ, വ്യാപാര ഏകീകരണം, സാമൂഹിക വികസനം എന്നിവ ലക്ഷ്യമിട്ടായിരുന്നു സംഘടനയുടെ തുടക്കം.

45ാം വാര്‍ഷികാഘോഷങ്ങള്‍ക്കായി ഗള്‍ഫ് രാജ്യങ്ങള്‍ ഒരുങ്ങുന്നതിനിടെ മേഖലയിലെ സാമ്പത്തിക മുന്നേറ്റങ്ങളാണ് വീണ്ടും ശ്രദ്ധ നേടുന്നത്. എണ്ണ സമ്പദ്‌വ്യവസ്ഥയില്‍ മാത്രം ആശ്രയിച്ചിരുന്ന ഗള്‍ഫ് മേഖല ഇപ്പോള്‍ സാമ്പത്തിക വൈവിധ്യവല്‍ക്കരണത്തിലേക്ക് ശക്തമായി നീങ്ങുകയാണ്. വിനോദസഞ്ചാരം, ബാങ്കിങ്, സാങ്കേതികവിദ്യ, ലോജിസ്റ്റിക്‌സ്, വ്യവസായം തുടങ്ങിയ മേഖലകളില്‍ വന്‍ നിക്ഷേപങ്ങളാണ് വിവിധ രാജ്യങ്ങള്‍ നടത്തുന്നത്.

ഗള്‍ഫ് സ്റ്റാറ്റിസ്റ്റിക്കല്‍ സെന്ററിന്റെ കണക്കുകള്‍ പ്രകാരം 2025ല്‍ ജി.സി.സി രാജ്യങ്ങളുടെ മൊത്ത ആഭ്യന്തര ഉല്‍പാദനം 2.4 ട്രില്യണ്‍ ഡോളറിലെത്തി. എണ്ണയിതര മേഖലകളുടെ വളര്‍ച്ചയാണ് ഈ മുന്നേറ്റത്തിന് പ്രധാന കാരണം. നിലവില്‍ ജി.സി.സി സമ്പദ്‌വ്യവസ്ഥയില്‍ എണ്ണയിതര മേഖലയുടെ പങ്ക് 78 ശതമാനത്തിലധികമാണെന്നാണ് റിപ്പോര്‍ട്ടുകള്‍ വ്യക്തമാക്കുന്നത്.

സൗദി അറേബ്യയുടെ 'വിഷന്‍ 2030', യു.എ.ഇയുടെ സാങ്കേതികവ്യാപാര വികസന പദ്ധതികള്‍, ഖത്തറിന്റെ ഊര്‍ജ നിക്ഷേപങ്ങള്‍, ഒമാന്റെയും ബഹ്‌റൈനിന്റെയും വ്യവസായടൂറിസം പദ്ധതികള്‍ എന്നിവ ഗള്‍ഫ് മേഖലയുടെ സാമ്പത്തിക വളര്‍ച്ചയ്ക്ക് പുതിയ ദിശ നല്‍കുന്ന പ്രധാന പദ്ധതികളായി വിലയിരുത്തപ്പെടുന്നു.

വിദേശ വ്യാപാര രംഗത്തും ഗള്‍ഫ് രാജ്യങ്ങള്‍ ശക്തമായ വളര്‍ച്ച തുടരുകയാണ്. കഴിഞ്ഞ വര്‍ഷം മാത്രം 1.6 ട്രില്യണ്‍ ഡോളറിലേറെ മൂല്യമുള്ള വ്യാപാര ഇടപാടുകളാണ് ജി.സി.സി രാജ്യങ്ങള്‍ നടത്തിയത്. ലോകത്തിലെ പ്രധാന തുറമുഖങ്ങളും വ്യോമഗതാഗത കേന്ദ്രങ്ങളും ഗള്‍ഫ് മേഖലയിലാണുള്ളത്.

പ്രാദേശിക വെല്ലുവിളികള്‍ക്കിടയിലും സാമ്പത്തിക സ്ഥിരതയും വികസനവും നിലനിര്‍ത്താന്‍ ഗള്‍ഫ് രാജ്യങ്ങള്‍ക്ക് കഴിഞ്ഞതായി നിരീക്ഷകര്‍ ചൂണ്ടിക്കാട്ടുന്നു. 45 വര്‍ഷം പിന്നിടുമ്പോള്‍ സാമ്പത്തിക ശക്തിയുടെയും പ്രാദേശിക ഐക്യത്തിന്റെയും പ്രധാന മാതൃകയായി ജി.സി.സി മാറുകയാണെന്ന വിലയിരുത്തലോടെയാണ് വാര്‍ഷികാഘോഷങ്ങള്‍ നടക്കുന്നത്.

GCC countries mark 45 years of unity and economic cooperation as the Gulf region records major growth in trade, investment, and non-oil sectors.