തിരുവനന്തപുരം: ഖാദി ബോര്‍ഡിലെ രേഖകളില്‍ കൃത്രിമം കാണിച്ച് പണം തട്ടിയ മുന്‍ കാഷ്യര്‍ക്ക് 56 വര്‍ഷം തടവ് വിധിച്ച് കോടതി. കേരള ഖാദി ഗ്രാമ വ്യവസായ ബോര്‍ഡ് മുന്‍ കാഷ്യറും ആറ്റിങ്ങല്‍ കോരാണി സ്വദേശിയുമായ ശിവരാജന്‍ ചെട്ടിയാറിനെയാണ് 64) കോടതി ശിക്ഷിച്ചത്. തടവിന് പുറമെ 2.80 ലക്ഷം രൂപ പിഴയായി ഒടുക്കണമെന്നും വിജിലന്‍സ് കോടതി ഉത്തരവിട്ടു. 

2001-11 കാലയളവില്‍ പ്രതി ബോര്‍ഡിന്റെ ഔദ്യോഗിക രേഖകളില്‍ തിരിമറി നടത്തി 21,88,599 രൂപ തട്ടിയെടുത്തെന്നാണ് കേസ്. 

വിജിലന്‍സ് തിരുവനന്തപുരം സ്‌പെഷ്യല്‍ ഇന്‍വെസ്റ്റിഗേഷന്‍ യൂനിറ്റ് മുന്‍ ഡിവൈഎസ്പിമാരായ ആര്‍.ഡി അജിത്, ജെ. പ്രസാദ്, കെ.വി മഹേഷ്ദാസ്, ടി. അനില്‍കുമാര്‍ എന്നിവര്‍ അന്വേഷണം നടത്തിയ കേസില്‍ എസ്.പിയായിരുന്ന വി. അജയകുമാറാണ് കുറ്റപത്രം സമര്‍പ്പിച്ചത്. വിജിലന്‍സിന് വേണ്ടി പബ്ലിക് പ്രോസിക്യൂട്ടര്‍ വീണ സതീശന്‍ ഹാജരായി.