തിരുവനന്തപുരം: തിരുവനന്തപുരം മെഡിക്കല്‍ കോളജ് ആശുപത്രിയില്‍ ശസ്ത്രക്രിയ കഴിഞ്ഞ രോഗിയുടെ കാലില്‍ പുഴുവരിച്ച സംഭവത്തില്‍ അടിയന്തര അന്വേഷണത്തിന് ഉത്തരവിട്ട് ആരോഗ്യമന്ത്രി കെ. മുരളീധരന്‍. സംഭവത്തെക്കുറിച്ച് അന്വേഷിച്ച് 48 മണിക്കൂറിനകം റിപോര്‍ട്ട് സമര്‍പ്പിക്കാന്‍ മന്ത്രി ആരോഗ്യവകുപ്പിന് നിര്‍ദേശം നല്‍കി. മെഡിക്കല്‍ കോളജ് വൈസ് പ്രിന്‍സിപ്പല്‍ അധ്യക്ഷനായ പ്രത്യേക അന്വേഷണ സമിതിയെയാണ് ഇതിനായി നിയോഗിച്ചിരിക്കുന്നത്. ഓര്‍ത്തോ, സര്‍ജറി വിഭാഗം തലവന്മാരും ഈ സമിതിയില്‍ അംഗങ്ങളാണ്.

രോഗിയുടെ ബന്ധുക്കളുടെ ഭാഗത്തുനിന്ന് ഔദ്യോഗികമായി പരാതി ലഭിച്ചിട്ടില്ലെങ്കിലും മാധ്യമ വാര്‍ത്തകളുടെ അടിസ്ഥാനത്തില്‍ സര്‍ക്കാര്‍ സ്വമേധയാ ആണ് അന്വേഷണം പ്രഖ്യാപിച്ചത്. രോഗികളോടും ഒപ്പമുള്ളവരോടും മോശമായി പെരുമാറുന്ന ആരോഗ്യ ജീവനക്കാര്‍ക്ക് പ്രത്യേക കൗണ്‍സലിങ് നല്‍കാനും തീരുമാനിച്ചിട്ടുണ്ടെന്ന് മന്ത്രി അറിയിച്ചു. ഇതോടൊപ്പം, ആശുപത്രിയിലെ കട്ടിലില്‍ നിന്ന് വീണ് മറ്റൊരു രോഗി മരിച്ച സംഭവത്തിലും കൃത്യമായ അന്വേഷണം നടത്തി കര്‍ശന നടപടിയുണ്ടാകുമെന്നും പോസ്റ്റ്‌മോര്‍ട്ടം റിപോര്‍ട്ട് ലഭിച്ച ശേഷം ബാക്കി കാര്യങ്ങള്‍ വ്യക്തമാക്കുമെന്നും ആരോഗ്യമന്ത്രി കൂട്ടിച്ചേര്‍ത്തു.

Health Minister K. Muraleedharan has ordered a high-level inquiry, demanding a report within 48 hours, after maggots were found in a patient's leg at Thiruvananthapuram Medical College.