ന്യൂഡല്‍ഹി: കേന്ദ്ര വിദ്യാഭ്യാസ മന്ത്രിയുടെ രാജി ആവശ്യപ്പെട്ട് കോക്രോച്ച് ജനത പാര്‍ട്ടി ആഹ്വാനം ചെയ്ത പ്രതിഷേധ മാര്‍ച്ച് ഞായറാഴ്ച്ച. രാവിലെ ഒന്‍പത് മണിക്ക് ആരംഭിക്കുന്ന മാര്‍ച്ചിന്റെ വിശദാംശങ്ങള്‍ സിജെപി പുറത്തുവിട്ടു. ഞായറാഴ്ച്ച രാവിലെ 9 മണിക്ക് പാര്‍ലമെന്റ് സ്ട്രീറ്റ് പൊലിസ് സ്റ്റേഷന് സമീപത്തുനിന്ന് ജന്തര്‍ മന്ദറിലേക്കാണ് മാര്‍ച്ച് നിശ്ചയിച്ചിരിക്കുന്നത്. 

മാര്‍ച്ചിന് മുന്നോടിയായി പുറത്തുവിട്ട നോട്ടീസില്‍ പ്രവര്‍ത്തകര്‍ക്കുള്ള നിര്‍ദേശങ്ങള്‍ സിജെപി പുറത്തുവിട്ടു. മാര്‍ച്ചിന് എത്തുന്നവര്‍ ദേശീയ പതാകയും, പുസ്തകവും കയ്യില്‍ കരുതണമെന്നും, മൊബൈല്‍ ഫോണ്‍ ഉപയോഗിച്ച് റെക്കോര്‍ഡ് ചെയ്ത് തത്സമയ ദൃശ്യങ്ങള്‍ പ്രചരിപ്പിക്കണമെന്നും നോട്ടീസില്‍ പറയുന്നു. മാര്‍ച്ചില്‍ എന്തെങ്കിലും അനിശ്ട സംഭവങ്ങള്‍ ഉണ്ടായാല്‍ നേരിട്ട് ഇടപെടാതെ പൊലിസിനെ അറിയിക്കണമെന്നും, ഡല്‍ഹിയിലെ ചൂടിനെ പ്രതിരോധിക്കാന്‍ മുന്‍കരുതല്‍ എടുക്കണമെന്നും സിജെപി വ്യക്തമാക്കുന്നു. 

ALSO READ: എബോള ഭീഷണി; രാജ്യത്ത് വീണ്ടും ആശങ്ക; സുഡാനില്‍ നിന്നെത്തിയ വിദ്യാര്‍ഥി നിരീക്ഷണത്തില്‍ 

മാത്രമല്ല, ഒറ്റയ്ക്ക് വരാതെ കൂട്ടമായി പാര്‍ലമെന്റ് സ്ട്രീറ്റിലെത്തുക, പൊലിസുകാര്‍ക്ക് പൂക്കള്‍ സമ്മാനിക്കണമെന്നും, സാമൂഹിക മാധ്യമങ്ങളിലെ ട്രോളുകളോട് പ്രതികരിക്കരുതെന്നും, കൃത്യ സമയത്ത് ആഹാരം കഴിച്ച് ആരോഗ്യവാനിയിരിക്കണമെന്നും സിജെപി നോട്ടീസില്‍ പറയുന്നു. സമാധാനപരവും, ജനാധിപത്യ രീതിയിലുമുള്ള സമരത്തിനാണ് തങ്ങള്‍ ആഹ്വാനം ചെയ്തതെന്നും, കേന്ദ്ര വിദ്യാഭ്യാസ മന്ത്രി ധര്‍മേന്ദ്ര പ്രധാന്റെ രാജിയാണ് അന്തിമ ലക്ഷ്യമെന്നും സിജെപി പ്രവര്‍ത്തകര്‍ വ്യക്തമാക്കി.