കോഴിക്കോട്: സ്വകാര്യ ബസും ബൈക്കും കൂട്ടിയിടിച്ച് ബൈക്ക് യാത്രികനായ യുവാവ് മരിച്ചു. മായനാട് മേലെ തട്ടാരി ഷബീര്‍, ഷമീന ദമ്പതികളുടെ മൂത്ത മകന്‍ അലി അഫാന്‍ (18) ആണ് മരണപ്പെട്ടത്. ഇന്നലെ രാവിലെ 8.30ഓടെ മെഡിക്കല്‍ കോളജ് കാരന്തൂര്‍ റോഡില്‍ മായനാട് ഒഴുക്കര ബസാറിന് സമീപം വെച്ചാണ് അപകടം. 

നരിക്കുനി നിന്നും കോഴിക്കോട്ടേക്ക് വരുന്ന സെന്ന എന്ന സ്വകാര്യ ബസും യുവാവ് ഓടിച്ച ബൈക്കും തമ്മില്‍ കൂട്ടിയിടിക്കുകയായിരുന്നു. റോഡില്‍ തെറിച്ചു വീണ് അലി അഫാനെ ഉടന്‍ തന്നെ മെഡിക്കല്‍ കോളജ് അത്യാഹിത വിഭാഗത്തില്‍ എത്തിച്ചെങ്കിലും വഴിമധ്യേ മരണപ്പെടുകയായിരുന്നു. 

ചേന്നമംഗലൂര്‍ ഹയര്‍സെക്കന്ററി സ്‌കൂളില്‍ എസ്.എസ്.എല്‍.സി കഴിഞ്ഞ് കെ.സി ഫൗണ്ടേഷനില്‍ ഖുര്‍ആന്‍ പഠിച്ചു കൊണ്ടിരിക്കയായിരുന്നു അലി അഫാന്‍. മെഡിക്കല്‍ കോളജ് പൊലിസ് ഇന്‍ക്വസ്റ്റ് നടത്തിയ മൃതദേഹം മായനാട് എ.യു.പി സ്‌കൂളില്‍ പൊതു ദര്‍ശനത്തിന് വെച്ചു. 

മായനാട് കോട്ടോ തടായി മഹല്ല് പള്ളി ഖബര്‍സ്ഥാനില്‍ സംസ്‌കരിച്ചു. സഹോദരങ്ങള്‍: അലി സയാന്‍, അലി അബാന്‍, അലീഷ.

A motorcycle rider lost his life in a tragic road accident after a collision between a private bus and a bike in Kozhikode. The impact of the crash proved fatal for the rider. Police have initiated an investigation into the incident, and further details regarding the circumstances leading to the accident are being examined.