ന്യൂഡൽഹി: തെക്കുകിഴക്കൻ ഡൽഹിയിലെ തുഗ്ലക്കാബാദ് എക്സ്റ്റൻഷനിൽ പാർപ്പിട സമുച്ചയത്തിലുണ്ടായ വൻ തീപിടിത്തത്തിൽ മൂന്ന് പേർ മരിച്ചു. രണ്ട് സ്ത്രീകളും ഒരു പുരുഷനുമാണ് മരിച്ചത്. ഇന്ന് പുലർച്ചെയോടെയായിരുന്നു അപകടം. പരുക്കേറ്റ എട്ട് പേരെ എയിംസ് ട്രോമ കെയർ സെന്ററിൽ പ്രവേശിപ്പിച്ചു.

കെട്ടിടത്തിനുള്ളിൽ കുടുങ്ങിപ്പോയ ആറ് പേരെ ഫയർഫോഴ്‌സ് ഉദ്യോഗസ്ഥർ സാഹസികമായി രക്ഷപ്പെടുത്തി. ഇതിൽ അഞ്ച് പേർ സ്ത്രീകളാണ്. മധ്യംമാർഗിലെ നയ താരാ അപ്പാർട്ട്മെന്റിന് സമീപമുള്ള ഗലി നമ്പർ 1-ലെ അഞ്ച് നിലകളുള്ള കെട്ടിടത്തിലാണ് ദുരന്തമുണ്ടായത്.

പുലർച്ചെ 2.35-ഓടെയാണ് കെട്ടിടത്തിൽ തീപിടിത്തമുണ്ടായതെന്നാണ് വിവരം. കെട്ടിടത്തിന്റെ താഴത്തെ നിലയിൽ പാർക്ക് ചെയ്തിരുന്ന വാഹനങ്ങളിൽ നിന്നാണ് തീ പടർന്നതെന്നാണ് പ്രാഥമിക നിഗമനം. ബേസ്‌മെന്റിൽ നിന്ന് കെട്ടിടത്തിന്റെ മുകളിലെ രണ്ട് നിലകളിലേക്ക് തീ അതിവേഗം പടരുകയായിരുന്നു.

വിവരമറിഞ്ഞ് സ്ഥലത്തെത്തിയ ഫയർഫോഴ്‌സ് യൂണിറ്റുകൾ ഏറെ പ്രയത്നിച്ചാണ് പുലർച്ചെ 3.45-ഓടെ തീ പൂർണമായും നിയന്ത്രണവിധേയമാക്കിയത്.

ഏറെ ഇടുങ്ങിയ പ്രദേശത്താണ് കെട്ടിടം സ്ഥിതി ചെയ്യുന്നത്. അതുകൊണ്ട് തന്നെ രക്ഷാപ്രവർത്തനം അതീവ ദുഷ്‌കരമായിരുന്നുവെന്ന് രക്ഷാപ്രവർത്തനത്തിന് നേതൃത്വം നൽകിയ ഫയർഫോഴ്‌സ് ഉദ്യോഗസ്ഥൻ യശ്വന്ത് സിങ് മീണ പറഞ്ഞു. അപകടത്തെക്കുറിച്ച് ഡൽഹി പൊലിസ് അന്വേഷണം ആരംഭിച്ചിട്ടുണ്ട്.

Three people lost their lives after a massive fire broke out at a residential complex in Delhi. Fire tenders were rushed to the spot to control the blaze and rescue trapped residents. An investigation is underway to determine the cause of the fire.