തിരുവനന്തപുരം: സംസ്ഥാനത്ത് പകർച്ചവ്യാധി ഭീഷണി ശക്തമാകുന്നതിനിടെ നാഥനില്ലാതിരുന്ന അഞ്ച് ജില്ലകളിൽ പുതിയ ജില്ലാ മെഡിക്കൽ ഓഫീസർമാരെ (ഡിഎംഒ) നിയമിച്ച് സർക്കാർ ഉത്തരവായി. കോഴിക്കോട്, കണ്ണൂർ, കാസർകോട്, മലപ്പുറം, ഇടുക്കി എന്നീ ജില്ലകളിലാണ് ഒടുവിൽ നിയമനം നടന്നത്. ഡിഎംഒമാരില്ലാത്തത് വലിയ രാഷ്ട്രീയ വിവാദങ്ങൾക്കും പ്രതിപക്ഷ-ഭരണപക്ഷ വിമർശനങ്ങൾക്കും വഴിവെച്ചതിന് പിന്നാലെയാണ് അടിയന്തരമായി ഒഴിവുകൾ നികത്താൻ സർക്കാർ തയ്യാറായത്.

പുതിയ ഡിഎംഒമാരും ജില്ലകളും:

കോഴിക്കോട്: ഡോ. എൽ. ടി. സരിതകുമാരി

കണ്ണൂർ: ഡോ. വിവേക് കുമാർ ആർ.

കാസർകോട്: ഡോ. രേഖ കെ. ടി.

മലപ്പുറം: ഡോ. വിനോദ് വി.

ഇടുക്കി: ഡോ. ഐപ്പ് ജോസഫ്

ഷിഗെല്ല, നിപ തുടങ്ങിയ മാരക പകർച്ചവ്യാധികളുടെ ഭീഷണി നിലനിൽക്കുന്ന സാഹചര്യത്തിലും ഡിഎംഒ തസ്തികകൾ ഒഴിഞ്ഞുകിടന്നത് വലിയ ജനവിരുദ്ധതയായി ചൂണ്ടിക്കാണിക്കപ്പെട്ടിരുന്നു. ഡിഎംഒ നിയമനം നീണ്ടുപോകാൻ കാരണം രാഷ്ട്രീയ ചരടുവലികളാണെന്ന ആക്ഷേപമാണ് ശക്തമായി ഉയർന്നത്.

കോഴിക്കോട് ജില്ലയിൽ മാത്രം ഡിഎംഒ സ്ഥാനത്തേക്ക് പതിനൊന്ന് പേരാണ് പരിഗണനയിലുണ്ടായിരുന്നത്. കാസർകോടും മലപ്പുറത്തും സമാനമായ രീതിയിൽ കടുത്ത വടംവലി നടന്നു. ഡിഎംഒമാരില്ലാത്തതിനാൽ അഡീഷണൽ ഡിഎംഒമാർക്കാണ് നിലവിൽ താൽക്കാലിക ചുമതല നൽകിയിരുന്നത്. ഇത് ആരോഗ്യരംഗത്തെ ഏകോപനത്തെ സാരമായി ബാധിക്കുന്നുവെന്ന പരാതിയും ഉയർന്നിരുന്നു.

പകർച്ചപ്പനികളുടെ കാലത്ത് ജില്ലാ മെഡിക്കൽ ഓഫീസർ ഉണ്ടായിരിക്കുകയെന്നത് ഏറ്റവും പ്രധാനപ്പെട്ട കാര്യമാണെന്നും, പ്രതിരോധ പ്രവർത്തനങ്ങൾ ഏകോപിപ്പിക്കേണ്ടത് അവരാണെന്നും ചൂണ്ടിക്കാട്ടി കെ. കെ. ശൈലജ രംഗത്തെത്തിയിരുന്നു. ഭരണ-പ്രതിപക്ഷ ഭേദമന്യേ കടുത്ത സമ്മർദ്ദവും വിമർശനവും ഉയർന്നതോടെയാണ് ഒടുവിൽ വിവാദങ്ങൾക്ക് വിരാമമിട്ട് സർക്കാർ അഞ്ച് ജില്ലകളിലും നിയമന ഉത്തരവ് ഇറക്കിയത്.

Amid rising concerns over the spread of infectious diseases, the government has finally appointed new District Medical Officers (DMOs) in five key districts of Kerala: Thiruvananthapuram, Kozhikode, Kannur, Kasaragod, Malappuram, and Idukki.