അബുദബി: യുഎഇയുടെ ദേശീയ റെയിൽവേ ശൃംഖലയായ ഇത്തിഹാദ് റെയിൽ പാസഞ്ചർ സർവീസുകൾ വ്യാപിപ്പിക്കുന്നതിന്റെ ഭാഗമായി പുതിയ യാത്രാ ചാർട്ടറും ആകർഷകമായ നിരക്കിളവുകളും പ്രഖ്യാപിച്ചു. കുട്ടികൾക്കും മുതിർന്ന പൗരന്മാർക്കും പ്രത്യേക ഇളവുകൾ നൽകുന്നതിനൊപ്പം നിശ്ചിത പ്രായത്തിലുള്ള കുഞ്ഞുങ്ങൾക്ക് സൗജന്യ യാത്രയും ചാർട്ടർ വാഗ്ദാനം ചെയ്യുന്നു.

ടിക്കറ്റ് നിരക്കിലെ പ്രധാന ഇളവുകൾ

കുട്ടികൾക്ക് 50% കിഴിവ്: 18 വയസ്സിന് താഴെയുള്ള കുട്ടികൾക്ക് എല്ലാ യാത്രകൾക്കും ടിക്കറ്റ് നിരക്കിൽ 50 ശതമാനം കിഴിവ് ലഭിക്കും. എന്നാൽ 14 വയസ്സിന് താഴെയുള്ള കുട്ടികൾ യാത്ര ചെയ്യുമ്പോൾ ഒപ്പം മുതിർന്ന ഒരാൾ ഉണ്ടായിരിക്കണം.

മുതിർന്ന പൗരന്മാർക്ക് 20% കിഴിവ്: യുഎഇ സ്വദേശികളും താമസക്കാരുമുൾപ്പെടെയുള്ള 60 വയസ്സിന് മുകളിൽ പ്രായമുള്ള മുതിർന്ന പൗരന്മാർക്ക് ടിക്കറ്റ് നിരക്കിൽ 20 ശതമാനം ഇളവുണ്ടാകും.

കുഞ്ഞുങ്ങൾക്ക് സൗജന്യ യാത്ര: രണ്ട് വയസ്സ് വരെയുള്ള കുട്ടികൾക്ക് ടിക്കറ്റില്ലാതെ സൗജന്യമായി യാത്ര ചെയ്യാം. എന്നാൽ ഇവർ മുതിർന്നവരുടെ മടിയിൽ ഇരുന്ന് യാത്ര ചെയ്യേണ്ടതാണ്, ഇവർക്കായി പ്രത്യേക സീറ്റോ ബാഗേജ് അലവൻസോ അനുവദിക്കില്ല. മുതിർന്ന വ്യക്തിക്കൊപ്പം ഒന്നിലധികം കുഞ്ഞുങ്ങൾ യാത്ര ചെയ്യുകയാണെങ്കിൽ, അധികമുള്ള ഓരോ കുട്ടിക്കും ചൈൽഡ് ടിക്കറ്റ് എടുക്കേണ്ടതുണ്ട്.

സാധാരണ നിരക്ക്: മറ്റ് പ്രത്യേക ഇളവുകൾക്ക് അർഹതയില്ലാത്ത 18 നും 59 നും ഇടയിൽ പ്രായമുള്ളവരിൽ നിന്ന് സാധാരണ ടിക്കറ്റ് നിരക്കായിരിക്കും ഈടാക്കുക.

യാത്രാവേളകളിൽ പ്രായം തെളിയിക്കുന്നതിനായി എമിറേറ്റ്സ് ഐഡി ഉൾപ്പെടെയുള്ള സാധുവായ തിരിച്ചറിയൽ രേഖകൾ യാത്രക്കാർ കൈവശം വെക്കണമെന്ന് ഇത്തിഹാദ് റെയിൽ അധികൃതർ വ്യക്തമാക്കി.

അബുദബി - ഫുജൈറ യാത്രാ നിരക്കുകൾ

ആദ്യ ഘട്ടത്തിൽ അബുദബി - ഫുജൈറ റൂട്ടിലെ കംഫർട്ട് ക്ലാസ് നിരക്കുകൾ 55 ദിർഹം മുതലും പ്രീമിയം ക്ലാസ് നിരക്കുകൾ 120 ദിർഹം മുതലും ആരംഭിക്കും. റെയിൽ ശൃംഖല വ്യാപിപ്പിക്കുന്നതിനനുസരിച്ച് മറ്റ് റൂട്ടുകളിലെ നിരക്കുകൾ പിന്നീട് പ്രഖ്യാപിക്കും. പ്രാരംഭ ഘട്ടത്തിൽ കൂടുതൽ യാത്രക്കാരെ ആകർഷിക്കുന്നതിനാണ് ഈ ആമുഖ വില നിശ്ചയിച്ചിട്ടുള്ളത്.

ഇത്തിഹാദ് റെയിലിൽ യാത്ര ചെയ്യുന്നതിന് മുൻകൂർ ബുക്കിംഗ് നിർബന്ധമാക്കിയിട്ടുണ്ട്. ട്രെയിൻ പുറപ്പെടുന്നതിന് 5 മിനിറ്റ് മുൻപ് വരെ ടിക്കറ്റുകൾ ബുക്ക് ചെയ്യാം. ടിക്കറ്റില്ലാതെ യാത്ര ചെയ്യാൻ അനുവദിക്കില്ല.

യാത്രക്കാരുടെ സുരക്ഷ ശക്തമാക്കുന്നതിന്റെ ഭാഗമായി അബുദബി പൊലിസ് മുഹമ്മദ് ബിൻ സായിദ് സിറ്റിയിലെ ഇത്തിഹാദ് റെയിൽ സ്റ്റേഷനിൽ പുതിയ സുരക്ഷാ ഓഫീസ് തുറന്നിട്ടുണ്ട്. അടിയന്തര ഘട്ടങ്ങളിൽ വേഗത്തിൽ ഇടപെടുന്നതിനും പരാതികൾ സ്വീകരിക്കുന്നതിനും നഷ്ടപ്പെടുന്ന സാധനങ്ങൾ കൈകാര്യം ചെയ്യുന്നതിനും ഈ ഓഫീസ് യാത്രാക്കാർക്ക് സഹായകരമാകും.

Etihad Rail has introduced special fares for children and senior citizens, requiring a valid Emirates ID for age verification to ensure eligibility and a smooth ticket booking process.