കാനഡ x  മൊറോക്കോ   -  ഫ്രാന്‍സ് x  പരാഗ്വെ
ഹൂസ്റ്റണ്‍:  ഫിഫ ലോകകപ്പില്‍ പ്രീ ക്വാര്‍ട്ടര്‍ പോരാട്ടങ്ങള്‍ക്ക് ഇന്ന് തുടക്കം. ഇന്ത്യന്‍ സമയം രാത്രി 10.30ന് നടക്കുന്ന ആദ്യ പോരാട്ടത്തില്‍ മൊറോക്കോയും കാനഡയുമാണ് ഏറ്റുമുട്ടുന്നത്. റൗണ്ട് ഓഫ് 32 മത്സരത്തില്‍ ശക്തരായ നെതര്‍ലന്‍ഡ്‌സിനെ കീഴടക്കിയെത്തുന്ന മൊറോക്കോ തികഞ്ഞ ആത്മവിശ്വാസത്തിലാണ്. ഇഞ്ചുറി ടൈം ഗോളില്‍ സമനില പിടിച്ച് പെനാല്‍റ്റി ഷൗട്ടൗട്ടിലാണ് അഷ്‌റഫ് ഹക്കീമിയും സംഘവും ഡച്ച് പടയെ നാട്ടിലേക്കയച്ചത്. ഇന്ന് വലിയവെല്ലു വിളികളില്ലാതെ കാനഡയെ കീഴടക്കാനാകുമെന്ന പ്രതീക്ഷയിലാണ് മൊറോക്കോ കളത്തിലെത്തുക.
മറുവശത്ത് ദക്ഷിണാഫ്രിക്കയെ എതിരില്ലാത്ത ഒരു ഗോളിന് വീഴ്ത്തിയാണ് കാനഡ പ്രീക്വാര്‍ട്ടറിനെത്തുന്നത്. ലോകകപ്പ് ചരിത്രത്തിലാദ്യമായായിരുന്നു കാനഡയുടെ ഒരു നോക്കൗട്ട് വിജയം.
ഇന്ത്യന്‍ സമയം രാത്രി 2.30ന് നടക്കുന്ന രണ്ടാം പ്രീക്വാര്‍ട്ടറില്‍ ശക്തരായ ഫ്രാന്‍സ് പരാഗ്വെയെ നേരിടും. റൗണ്ട് ഓഫ് 32ല്‍ സ്വീഡനെ എതിരില്ലാത്ത മൂന്ന് ഗോളിന് വീഴ്ത്തിയാണ് ഫ്രഞ്ച് പടയെത്തുന്നത്. എന്നാല്‍ ശക്തരായ ജര്‍മനിയെ വീഴ്ത്തിയെത്തുന്ന പരാഗ്വെയെ ദിദിയര്‍ ദെഷാംസും സംഘവും കരുതലോടെ നേരിടേണ്ടി വരും.