തിരുവനന്തപുരം: സംസ്ഥാന സർക്കാർ ലഹരിക്കെതിരേ നടപ്പാക്കി വരുന്ന ഓപറേഷൻ തൂഫാൻ പദ്ധതിയുടെ ഭാഗമായി സമസ്ത കേരള ഇസ് ലാം മത വിദ്യാഭ്യാസ ബോർഡ് പ്രഖ്യാപിച്ച ദ്വൈവാര സ്‌പെഷൽ കാംപയിന് ഇന്ന് തുടക്കം. സംസ്ഥാനതല ഉദ്ഘാടനം ഇന്ന് വൈകീട്ട് നാലിന് വിഴിഞ്ഞത്ത് ആഭ്യന്തര മന്ത്രി രമേശ് ചെന്നിത്തല നിർവഹിക്കും. വിദ്യാഭ്യാസ ബോർഡ് ജനറൽ സെക്രട്ടറി എം.ടി അബ്ദുല്ല മുസ്‌ലിയാർ അധ്യക്ഷനാകും. അഡ്വ. എം. വിൻസന്റ് എം.എൽ.എ മുഖ്യപ്രഭാഷണം നടത്തും. 

കാംപയിനോടനുബന്ധിച്ച് നടത്തുന്ന സ്‌പെഷൽ അസംബ്ലിയിൽ വിദ്യാഭ്യാസ ബോർഡ് സെക്രട്ടറി ഡോ. എൻ.എ.എം അബ്ദുൽ ഖാദർ പ്രതിജ്ഞാ വാചകം ചൊല്ലിക്കൊടുക്കും.  പദ്ധതി വിഭാവനം ചെയ്ത രമേശ് ചെന്നിത്തലയ്ക്ക് സമസ്തയുടെ ഉപഹാരം സാബിഖലി ശിഹാബ് തങ്ങളും വിദ്യാർഥികൾക്കു വേണ്ടി മദ്‌റസ വിദ്യാർഥികളും സമ്മാനിക്കും.

വിഴിഞ്ഞം മഖാമിനു സമീപത്തെ മൈതാനിയിൽ ആയിരത്തിൽപരം പേർക്ക് ഇരിക്കാവുന്ന പ്രത്യേകം സജ്ജീകരിച്ച പന്തലിലാണ്  പരിപാടി. സമസ്ത കേന്ദ്ര മുശാവറ അംഗങ്ങളും വിദ്യാഭ്യാസ ബോർഡ് മെംബർമാരും സമസ്തയുടെയും പോഷക സംഘടനകളുടെയും നേതാക്കളും മഹല്ല്, മദ്‌റസ ഭാരവാഹികളും ജനപ്രതിനിധികൾ ഉൾപ്പെടെ  പൗരപ്രമുഖരും ഉന്നത പൊലിസ് ഉദ്യോഗസ്ഥരും  സംബന്ധിക്കും. സമസ്ത കാംപയിന്റെയും ഓപറേഷൻ തൂഫാന്റെയും ലോഗോ മുദ്രണം ചെയ്ത് പ്രത്യേകം തയാറാക്കിയ ടീ ഷർട്ട് അണിഞ്ഞ 300  പേർ സദസിന്റെ മുൻ നിരയിൽ അണിനിരക്കും.

ഓപറേഷൻ തൂഫാന്റെ ഭാഗമായി ഈ മാസം 25നു രാവിലെ 9നു   മുഴുവൻ മദ്‌റസകളിലും അൽ ബിർ, അസ്മി സ്‌കൂൾസ്, ഫാളില - ഫളീല,എസ്.എൻ.ഇ.സി, മറ്റു സ്ഥാപനങ്ങളിലും സ്‌പെഷൽ അസംബ്ലി നടക്കും.  അസംബ്ലിയിൽ ലഹരിക്കെതിരേ കൂട്ട പ്രതിജ്ഞയെടുക്കും. 24ന് വെള്ളിയാഴ്ച പള്ളികളിൽ ഉദ്ബോധനം നടക്കും. കാംപയിന്റെ ഉദ്ഘാടന  പരിപാടി വൻ വിജയമാക്കാൻ വിഴിഞ്ഞത്ത് എല്ലാ വിധ തയാറെടുപ്പുകളും പൂർത്തിയായതായി വിദ്യാഭ്യാസ ബോർഡ് ജനറൽ മാനേജർ കെ. മോയിൻകുട്ടി മാസ്റ്റർ അറിയിച്ചു.

Operation Toufan is an organizational and social awareness campaign launched by Samastha (a major Islamic educational and religious body in Kerala).