പാലക്കാട്: വടക്കഞ്ചേരിയില്‍ ബസും സി.എന്‍.ജി സിലിണ്ടറുകള്‍ കയറ്റിവന്ന ലോറിയും കൂട്ടിയിടിച്ച് മറിഞ്ഞ് ഒമ്പത് പേര്‍ക്ക് പരിക്കേറ്റു. തങ്കം ജങ്ഷനില്‍ നിന്ന് സര്‍വീസ് റോഡ് വഴി വരികയായിരുന്ന ദീര്‍ഘദൂര സര്‍വീസ് ബസും കെഎസ്ആര്‍ടിസി ഡിപ്പോയ്ക്ക് സമീപമുള്ള അടിപ്പാതയിലൂടെ സര്‍വീസ് റോഡിലേക്ക് പ്രവേശിക്കുകയായിരുന്ന ലോറിയുമാണ് റോയല്‍ ജങ്ഷനില്‍ വെച്ച് കൂട്ടിയിടിച്ചത്. അപകടത്തിന്റെ തീവ്രതയില്‍ ലോറി മറിയുകയായിരുന്നു.

വാഹനങ്ങളില്‍ ഇന്ധനം നിറയ്ക്കുന്നതിനായുള്ള നാല്‍പ്പതോളം സി.എന്‍.ജി സിലിണ്ടറുകളാണ് ലോറിയിലുണ്ടായിരുന്നത്. ഇടിയുടെ ആഘാതത്തില്‍ സിലിണ്ടറുകളില്‍ നിന്ന് ഉഗ്രശബ്ദത്തോടെ വാതകം പുറത്തേക്ക് ചോര്‍ന്നു. ഇത്തരത്തില്‍ പുറന്തള്ളപ്പെട്ട വാതകത്തില്‍ നിന്ന് ലോറി ഡ്രൈവര്‍ക്കും സഹായിക്കും 'കോള്‍ഡ് ബേണ്‍സ്' (Cold Burns) മൂലം പൊള്ളലേറ്റു.

പരിക്കേറ്റ ബസ് യാത്രക്കാരുടെ നില തൃപ്തികരമാണ്. എല്ലാവരെയും ഇരട്ടക്കുളത്തെ സ്വകാര്യ ആശുപത്രിയില്‍ പ്രവേശിപ്പിച്ചു. വടക്കഞ്ചേരിയില്‍ നിന്നെത്തിയ അഗ്‌നിരക്ഷാസേന ഉടന്‍തന്നെ ചോര്‍ച്ചയടച്ച് വാതകം നിര്‍വീര്യമാക്കിയതിനാല്‍ വന്‍ ദുരന്തമാണ് ഒഴിവായത്. ഹൈവേ പൊലിസും വടക്കഞ്ചേരി പൊലിസും സ്ഥലത്തെത്തി തുടര്‍ നടപടികള്‍ സ്വീകരിച്ചു.

എന്താണ് കോള്‍ഡ് ബേണ്‍സ്? 

സി.എന്‍.ജി ചോര്‍ച്ചയില്‍ തീപിടിത്തം ഉണ്ടായില്ലെങ്കില്‍ പോലും പൊള്ളലേല്‍ക്കാന്‍ സാധ്യതയുണ്ട്. ഇതിനെയാണ് 'കോള്‍ഡ് ബേണ്‍സ്' അല്ലെങ്കില്‍ 'ഫ്രോസ്റ്റ് ബൈറ്റ്' എന്ന് വിളിക്കുന്നത്. സിലിണ്ടറുകളില്‍ അതീവ മര്‍ദ്ദത്തില്‍ സൂക്ഷിച്ചിരിക്കുന്ന വാതകം ചോര്‍ച്ചയുണ്ടാകുമ്പോള്‍ പെട്ടെന്ന് വികസിക്കുകയും ഇതിന്റെ താപനില പൂജ്യത്തിനും താഴേക്ക് അതിവേഗം താഴുകയും ചെയ്യുന്നു.

ഈ സമയത്ത് വാതകം ചര്‍മ്മത്തില്‍ നേരിട്ട് തട്ടിയാല്‍ കോശങ്ങള്‍ ഉറഞ്ഞുപോവുകയും തീപ്പൊള്ളലിന് സമാനമായി തൊലിപ്പുറത്ത് ഗുരുതരമായി പരിക്കേല്‍ക്കുകയും ചെയ്യും. സി.എന്‍.ജി ചോര്‍ച്ചയുണ്ടായാല്‍ വാതകം നേരിട്ട് തൊടാനോ ശ്വസിക്കാനോ പാടില്ല.

Nine people were injured when a bus collided with a CNG lorry in Vadakkencherry, where a major tragedy was averted after the fire force neutralized the leaking gas that caused cold burns to the lorry crew.