മൊഹാലി: ഇന്ത്യന്‍ ക്യാപ്റ്റന്‍ മഹേന്ദ്ര സിങ് ധോണിയുടെ തൊപ്പിയില്‍ മറ്റൊരു പൊന്‍തൂവല്‍ കൂടി. ഏകദിനത്തില്‍ 9000 റണ്‍സ് പൂര്‍ത്തിയാക്കുന്ന അഞ്ചാമത്തെ ഇന്ത്യന്‍ ബാറ്റ്‌സ്മാനായി ധോണി മാറി. നേട്ടം സ്വന്തമാക്കുന്ന ലോകത്തിലെ മൂന്നാമത്തെ വിക്കറ്റ് കീപ്പര്‍ ബാറ്റ്‌സ്മാനും ധോണി തന്നെ. ന്യൂസിലന്‍ഡിനെതിരേ 80 റണ്‍സെടുത്താണ് ധോണി ക്ലബിലെത്തിയത്. സച്ചിന്‍ ടെണ്ടുല്‍ക്കര്‍ (18,426), സൗരവ് ഗാംഗുലി (11,363), രാഹുല്‍ ദ്രാവിഡ് (10,889), മുഹമ്മദ് അസ്ഹറദ്ദീന്‍ (9378) എന്നിവരാണ് നേരത്തെ നേട്ടം സ്വന്തമാക്കിയ ഇന്ത്യന്‍ താരങ്ങള്‍. കടമ്പ കടക്കുന്ന മൂന്നാമത്തെ വിക്കറ്റ് കീപ്പര്‍ ബാറ്റ്‌സ്മാനാണ് ധോണി. കുമാര്‍ സംഗക്കാര (14,234), ആദം ഗില്‍ക്രിസ്റ്റ് (9619) എന്നിവരാണ് ആദ്യ രണ്ടു സ്ഥാനങ്ങളില്‍.
ഏകദിനത്തില്‍ ഏറ്റവും കൂടുതല്‍ സിക്‌സറുകള്‍ നേടുന്ന ഇന്ത്യന്‍ താരമെന്ന റെക്കോര്‍ഡും ഇനി ധോണിക്ക് സ്വന്തമാണ്. മത്സരത്തില്‍ മൂന്നു സിക്‌സറുകള്‍ പറത്തി ധോണി നേട്ടം 195ല്‍ എത്തിച്ചു. സച്ചിന്‍ ടെണ്ടുല്‍ക്കറുടെ 193 സിക്‌സറുകളുടെ ഇന്ത്യന്‍ റെക്കോര്‍ഡാണ് വഴിമാറിയത്. മൊത്തം കണക്കില്‍ ധോണി അഞ്ചാം സ്ഥാനത്താണ്. 351 സിക്‌സറുകളുമായി ഷാഹിദ് അഫ്രീദിയാണ് മുന്നില്‍. ജയസൂര്യ, ഗെയില്‍, മെക്കല്ലം എന്നിവരാണ് രണ്ടു മുതല്‍ അഞ്ചു വരെ സ്ഥാനത്ത്.