മൂവാറ്റുപുഴ: കൊച്ചി-ധനുഷ്‌കോടി ദേശീയപാതയില്‍ മൂവാറ്റുപുഴ ചാലിക്കടവ് പാലത്തിനു സമീപം സ്വകാര്യ കേബിള്‍ പോസ്റ്റ് അപകട ഭീഷണിയാകുന്നു. ഏറ്റവും തിരക്കേറിയ ചാലിക്കടവ് ജങ്ഷനിലാണ് പോസ്റ്റ് അപകടഭീഷണിയായി നില്‍ക്കുന്നത്. നിരവധി വാഹനങ്ങളും കാല്‍നടയാത്രികരും സ്‌കൂള്‍ കുട്ടികളും കടന്നുപോകുന്ന റോഡിനരികിലായി കേബിള്‍ വലിക്കുന്നതിനുവേണ്ടി സ്ഥാപിച്ച പോസ്റ്റാണ് എപ്പോള്‍ വേണമെങ്കിലും മറിഞ്ഞു വീഴാറായി നില്‍ക്കുന്നത്.
നിരവധി പരാതികള്‍ അധികാരികളോട് ഉന്നയിച്ചെങ്കിലും ഇതുവരെ പോസ്റ്റ് നീക്കം ചെയ്യുവാന്‍ നടപടിയായിട്ടില്ല. പോസ്റ്റ് മാറ്റാത്തപക്ഷം മൂവാറ്റുപുഴ പൗരസമിതിയുടെ നേതൃത്വത്തില്‍ കേബിള്‍ പോസ്റ്റ് നീക്കം ചെയ്യുമെന്ന് പ്രസിഡന്റ് ജിജോ പാപ്പാലില്‍ അധികാരികളെ അറിയിച്ചു.