ആലപ്പുഴ: പ്രതിപക്ഷ നേതാവ് വി.എസ് അച്യുതാനന്ദന്‍ വോട്ടുചെയ്യുമ്പോള്‍ എത്തിനോക്കിയെന്ന പ്രചാരണം നിഷേധിച്ച് അമ്പലപ്പുഴയിലെ എല്‍.ഡി.എഫ് സ്ഥാനാര്‍ഥി ജി. സുധാകരന്‍. താന്‍ ഒരു തെറ്റും ചെയ്തിട്ടില്ല. വീഴ്ചവരുത്തിയത് സര്‍ക്കാരും പൊലിസുമാണ്. തനിക്ക് വോട്ടുചെയ്യാന്‍ വേണ്ടിയാണ് വി.എസ് പാലക്കാടുനിന്ന് അമ്പലപ്പുഴയില്‍ എത്തിയതെന്നും അദ്ദേഹം പറഞ്ഞു.

മാധ്യമങ്ങള്‍ തന്നെ വളഞ്ഞിട്ട് ആക്രമിക്കുകയാണ്. പാര്‍ട്ടി പത്രമായ ദേശാഭിമാനി പോലും തന്നെ സംരക്ഷിച്ചില്ല. വി.എസും താനും തമ്മില്‍ നല്ല ആത്മബന്ധമാണ്. വി.എസിന്റെ പ്രസംഗത്തിലൂടെ തനിക്ക് നിരവധി വോട്ടുകിട്ടിയെന്നും സുധാകരന്‍ പറഞ്ഞു.

വി.എസ് അച്യുതാനന്ദന്‍ വോട്ട് ചെയ്യുന്നത് ജി. സുധാകരന്‍ എത്തിനോക്കിയെന്ന പരാതിയുമായി യു.ഡി.എഫാണ് രംഗത്ത് വന്നത്.
ആലപ്പുഴയിലെ പറവൂര്‍ ഗവ. സ്‌കൂളിലായിരുന്നു വി.എസിന് വോട്ട്. കുടുംബസമേതമാണ് അദ്ദേഹം വോട്ട് ചെയ്യാന്‍ എത്തിയത്.
പോളിംഗ് ബൂത്തില്‍ വി.എസിനൊപ്പം എത്തിയ മകന്‍ അരുണ്‍ കുമാര്‍ വോട്ടിംഗ് മെഷീനില്‍ വോട്ടുചെയ്യുന്നത് വി.എസിന് കാണിച്ചുകൊടുക്കുന്നത് ചിത്രങ്ങളില്‍ വ്യക്തമാണ്. ആ സമയം ജി. സുധാകരന്‍ വോട്ടിങ് മെഷീനിലേക്ക് എത്തിനോക്കുന്നതും കാണാം.