കടമേരി: മുസ്‌ലിം കേരളത്തിന്റെ വൈജ്ഞാനിക മുന്നേറ്റത്തില്‍ ബൗദ്ധിക വിപ്ലവം നയിച്ച പണ്ഡിത ശ്രേഷ്ഠനായിരുന്നു കടമേരി റഹ്മാനിയ്യ സ്ഥാപന സമുച്ചയങ്ങളുടെ സ്ഥാപകന്‍ ചീക്കിലോട്ട് കുഞ്ഞമ്മദ് മുസ്‌ലിയാരെന്ന് സമസ്ത സെക്രട്ടറി കോട്ടുമല ടി.എം. ബാപ്പു മുസ്‌ലിയാര്‍ പ്രസ്താവിച്ചു. കടമേരി റഹ്മാനിയ്യ അറബിക് കോളജില്‍ നടന്ന ചീക്കിലോട്ട് കുഞ്ഞമ്മദ് മുസ്‌ലിയാര്‍ അനുസ്മരണത്തില്‍ സംസാരിക്കുകയായിരുന്നു അദ്ദേഹം. എം.എം. ബശീര്‍ മുസ്‌ലിയാരും അദ്ദേഹവും ചേര്‍ന്ന് നടത്തിയ മുന്നേറ്റമാണ് കേരളത്തിലെ സമന്വയ വിദ്യാഭ്യാസത്തിന് ശിലപാകിയത്. കാലം നേരിടുന്ന വെല്ലുവിളികളെ അതിജയിക്കാന്‍ പ്രബോധക സംഘത്തെ സജ്ജമാക്കുന്നതില്‍ അവര്‍ വിജയിച്ചുവെന്നതിന്റെ അടയാളമാണ് ഇന്ന് കാണുന്ന പുരോഗതി. എല്ലാ കാലത്തിനോടും സംവദിക്കാന്‍ പ്രാപ്തരാകുക എന്നതാണ് പണ്ഡിതന്മാരുടെ ഉത്തരവാദിത്തമെന്നും അദ്ദേഹം പറഞ്ഞു. റഹ്മാനിയ്യ വര്‍ക്കിങ് പ്രസിഡന്റ് എസ്. പി.എം തങ്ങള്‍ അധ്യക്ഷനായി.