അരൂര്‍: കെ.എസ്.ഇ .ബി യുടെ 11 കെ.വി കേബിള്‍ സ്ഥാപിക്കുന്നതിനായി കുഴി കുത്തിയതോടെ ജപ്പാന്‍ കുടിവെള്ള പൈപ്പ് പൊട്ടി വെള്ളം പാഴാകുന്നു.അരൂര്‍ - അരൂക്കുറ്റി റോഡില്‍ ഇല്ലത്തു ജംഗ്ഷനില്‍ ഇന്നലെ രാവിലെയായിരുന്നു സംഭവം. പൈപ്പ് പൊട്ടിയതോടെ പ്രദേശത്ത് കുടിവെള്ള ക്ഷാമം രൂക്ഷമായി. കടുത്ത വേനലായതിനാല്‍ മറ്റു കുടിവെള്ള സ്രോതസ്സുകള്‍ വറ്റിവരണ്ട സ്ഥിതിയാണ്. ഭൂഗര്‍ഭ ജലമാകട്ടെ പല പ്രദേശങ്ങളിലും ഉപ്പ് കലര്‍ന്ന് മലിനമാണ്. ഈ സാഹചര്യത്തില്‍ ജപ്പാന്‍ കുടിവെള്ളം മാത്രമാണ് ജനങ്ങളുടെ ഏക ആശ്രയം.പൈപ്പ് പൊട്ടിയതോടെ കെ.എസ്.ഇ.ബി ജീവനക്കാര്‍ പണി നിര്‍ത്തി സ്ഥലം വിട്ടു. തൈക്കാട്ടുശ്ശേരിയിലെ പമ്പിംഗ് സ്റ്റേഷനില്‍ വിവരം അറിയിച്ചാലെ വാല്‍വ് അടച്ച് ചോര്‍ച്ച നിര്‍ത്താനാവൂ.വാല്‍വ് പൂട്ടിയാല്‍ വലിയ ഒരു പ്രദേശത്ത് ആകെ വെള്ളം കിട്ടാത്ത സ്ഥിതിയാകും. ഈ സാഹചര്യത്തില്‍ ബന്ധപ്പെട്ട അധികാരികള്‍ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.