തളിപ്പറമ്പ്: മെയിന്‍ റോഡിലെ ഫ്രൂട്‌സ് കടയ്ക്കുനേരെ സാമൂഹ്യവിരുദ്ധരുടെ അക്രമം. തളിപ്പറമ്പ് മെയിന്‍ റോഡിലെ ജെ.എഫ്.സി ഫ്രൂട്‌സ് കടയില്‍ പഴങ്ങള്‍ വില്‍പ്പനയ്ക്കായി നിരത്തിവയ്ക്കുന്ന തട്ടുകളാണ് കഴിഞ്ഞ ദിവസം രാത്രി സാമൂഹ്യവിരുദ്ധര്‍ തകര്‍ത്തത്. രാത്രി എട്ടു വരെ കട തുറന്നുപ്രവര്‍ത്തിച്ചിരുന്നു. ഇന്നലെ രാവിലെ സംഭവം ശ്രദ്ധയില്‍പെട്ട മറ്റു വ്യാപാരികള്‍ വിവരമറിയിക്കുകയായിരുന്നു. ഒരു മാസത്തിനിടെ രണ്ടാം തവണയാണ് കടയ്ക്കു നേരെ അക്രമമുണ്ടാകുന്നത്. കടഉടമ ജാഫര്‍ തളിപ്പറമ്പ് പൊലിസില്‍ പരാതി നല്‍കി. വ്യാപാരി നേതാക്കളായ കെ.എസ് റിയാസ്, വി താജുദ്ദീന്‍, കെ.പി ഹസന്‍ഹാജി തുടങ്ങിയവര്‍ കട സന്ദര്‍ശിച്ചു.