പെരിയ: കേന്ദ്രസര്‍വകലാശാലക്കു മുന്നില്‍ പെരിയ മാളോത്തുംപാറ കോളനിവാസികള്‍ നടത്തി വരുന്ന പട്ടിണി സമരം 42 ദിനം പിന്നിട്ടു. സമര സഹായ സമിതിയുടെ നേതൃത്വത്തില്‍ ജനുവരി അഞ്ചിനു സര്‍വകലാശാലയിലേക്കു പ്രതിഷേധ മാര്‍ച്ച് നടത്താന്‍ തീരുമാനിച്ചിട്ടുണ്ട്. മാര്‍ച്ചിന്റെ പ്രചരണാര്‍ഥം കോളനിയില്‍ ഊരുകൂട്ടം, വാര്‍ഡ് തലത്തില്‍ പൊതുയോഗം എന്നിവ സംഘടിപ്പിക്കും.
കേന്ദ്ര സര്‍വകലാശാലക്കു വേണ്ടി തങ്ങളുടെ കിടപ്പാടം ഉള്‍പ്പെടെയുള്ള സ്ഥലം വിട്ടു നല്‍കുമ്പോള്‍ പകരം സ്ഥലവും വീടും കുടുംബത്തിലെ ഒരാള്‍ക്കു ജോലിയുമെന്ന വാഗ്ദാനം അധികൃതര്‍ പാലിക്കാത്തതിനെ തുടര്‍ന്നാണു കോളനിവാസികള്‍ സര്‍വകലാശാല ആസ്ഥാനത്തിനു മുന്നില്‍ പട്ടിണി സമരം നടത്തുന്നത്.
ആദ്യ ഘട്ടത്തില്‍ രണ്ടു വീതം ചെറുപ്പക്കാരാണു സമരം കിടന്നതെങ്കിലും 25 ദിവസം പിന്നിട്ടതോടെ പട്ടിണി സമരം കോളനിയിലെ സ്ത്രീകള്‍ ഏറ്റെടുക്കുകയായിരുന്നു. സമരത്തിന്റെ ഭാഗമായി ദേശീയപാത ഉപരോധിക്കല്‍ സമരം ഉള്‍പ്പെടെ സമിതി നടത്തിയിരുന്നു. സാമൂഹ്യ പ്രവര്‍ത്തകന്‍ സി.ആര്‍ നീലകണ്ഠന്‍ സമരത്തിനു ഐക്യ ദാര്‍ഢ്യം പ്രഖ്യാപിച്ച് ഇന്നലെ സമരപ്പന്തലിലെത്തി.