തളിപ്പറമ്പ്: ബുധനാഴ്ച പുലര്‍ച്ചെ ദേശീയപാതയില്‍ ചുടല കപ്പണത്തട്ടില്‍ ദുരൂഹ സാഹചര്യത്തില്‍ കണ്ടെതിനെ തുടര്‍ന്ന് തളിപ്പറമ്പ് പൊലിസ് കസ്റ്റഡിയിലെടുത്ത കാര്‍ മോഷണ സംഘത്തിന്റേതെന്നു സൂചന. കാറില്‍ സഞ്ചരിച്ചിരുന്നത് മൂന്നംഗ സംഘമാണെന്നും ഇവര്‍ വാടകയ്ക്ക് എടുത്ത കാറാണിതെന്നും അന്വേഷണ സംഘം കണ്ടെത്തി. വാഹനത്തിന്റെ ആര്‍.സി ഉടമയോട് സ്‌റ്റേഷനില്‍ ഹാജരാകാന്‍ ആവശ്യപ്പെട്ടിട്ടുണ്ട്. പുലര്‍ച്ചെ പട്രോളിങിനിടെ നിര്‍ത്തിയിട്ട കാര്‍ ശ്രദ്ധയില്‍പെടുകയും പരിശോധനയ്ക്കായി സമീപത്തെത്തിയപ്പോള്‍ കാറിനുള്ളിലുണ്ടായിരുന്നവര്‍ ഓടി രക്ഷപ്പെടുകയുമായിരുന്നു. പൊലിസ് പിന്തുടര്‍ന്നെങ്കിലും ഇവരെ കണ്ടെത്താനായില്ല.
തുടര്‍ന്ന് വാഹനം പൊലിസ് സ്റ്റേഷനിലേക്ക് മാറ്റി. കഴിഞ്ഞ ദിവസങ്ങളില്‍ പരിയാരം പൊലിസ് സ്റ്റേഷന്‍ പരിധിയില്‍ നടന്ന മോഷണങ്ങള്‍ക്കു പിന്നില്‍ ഈ സംഘമാണെന്നു സംശയിക്കുന്നു.