താമരശേരി: കോഴിമാലിന്യ വാഹനം നാട്ടുകാര്‍ തടഞ്ഞു തിരിച്ചയച്ചു. ലോറി പോയ വഴിയില്‍ വാഹനത്തില്‍ നിന്നു മാലിനജലം റോഡില്‍ ഒഴുകി അസഹ്യമായ ദുര്‍ഗന്ധം കാരണം പുതുപ്പാടി ഒടുങ്ങാക്കാട് പള്ളിക്കു സമീപം നാട്ടുകാര്‍ തടയുകയായിരുന്നു. സംഭവമറിഞ്ഞു താമരശേരി പൊലിസ് എത്തിയപ്പോഴേക്കും ക്ലീനര്‍ ഓടി രക്ഷപ്പെട്ടു. ലോറിക്കു അകമ്പടിയായി വന്ന കാറും ഇതോടെ അപ്രത്യക്ഷമായി. മാലിന്യം കോഴിക്കോട്ടുനിന്നു കയറ്റിതാണെന്നും മുത്തങ്ങയില്‍ തള്ളാനുള്ളതാണെന്നുമാണ് കര്‍ണാടക സ്വദേശി ഡ്രൈവര്‍ പൊലിസിനോട് പറഞ്ഞത്. ചുരം സംരക്ഷണ സമിതി പ്രവര്‍ത്തകരെത്തി ചുരത്തിലൂടെ വാഹനം കടത്തില്ലെന്നറിയിച്ചതോടെ മാലിന്യം കയറ്റി കോഴിക്കോട്ടേക്കുതന്നെ ലോറി തിരിച്ചു വിടുകയായിരുന്നു. അസഹ്യമായ ദുര്‍ഗന്ധം മൂലം ഇവിടെ സ്‌റ്റേഷനില്‍ നിര്‍ത്താന്‍ പറ്റാത്താതാണ് ലോറി കസ്റ്റഡിയില്‍ എടുക്കാതിരുന്നത്.