ജിദ്ദ: കേന്ദ്ര സര്‍ക്കാര്‍ പുതിയ പാസ്‌പോര്‍ട്ട് പരിഷ്‌കരണം നടപ്പിലാക്കുന്നത് വിദേശത്ത് മരിക്കുന്ന പ്രവാസികളുടെ മൃതദേഹം നാട്ടിലെത്തിക്കുന്നതിനെ പ്രതികൂലമായി ബാധിക്കും.
സഊദി അടക്കമുള്ള രാജ്യങ്ങള്‍ മരിച്ച വ്യക്തിയുമായുള്ള ബന്ധം തെളിയിക്കുന്നതിനും മൃതദേഹം നാട്ടിലേക്ക് കൊണ്ടുപോകുന്നതിനുമുള്ള രേഖയായി നിലവില്‍ പാസ്‌പോര്‍ട്ടാണ് ഉപയോഗിക്കുന്നത്. എന്നാല്‍ കേന്ദ്രത്തിന്റെ പുതിയ തീരുമാനം ഇതിനെ പ്രതികൂലമായി ബാധിക്കും.
പാസ്‌പോര്‍ട്ടിലെ റസിഡന്‍ഷ്യല്‍ വിവരങ്ങളടങ്ങിയ പേജ് നീക്കം ചെയ്യുന്നതോടെ വിലാസവും വ്യക്തിഗത വിവരങ്ങളും പരിശോധിച്ച് മൃതദേഹം നാട്ടിലേക്ക് കൊണ്ടു പോകാനുള്ള പ്രക്രിയ നീളുന്നതാണ് പ്രശ്‌നങ്ങള്‍ക്ക് കാരണമാകുകയെന്ന് സാമൂഹിക പ്രവര്‍ത്തകര്‍ അഭിപ്രായപ്പെട്ടു. രോഗ ബാധിതരായ പ്രവാസികള്‍ക്കും വിദേശത്ത് മരിച്ച പ്രവാസികളുടെ കുടുംബത്തിനു കമ്പനി നല്‍കുന്ന സഹായത്തിനും പേജ് നീക്കുന്നത് വഴി തടസം നേരിടും.
അതേ സമയം നിലവിലെ പാസ്‌പോര്‍ട്ടില്‍ യാതൊരു പ്രശ്‌നങ്ങളുമില്ലാതിരിക്കെ വിദ്യാഭ്യാസമില്ലാത്തവരെ രണ്ടാംനിര പൗരന്മാരാക്കുന്ന പാസ്‌പോര്‍ട്ടിലെ നിറംമാറ്റം സര്‍ക്കാരിന്റെ തുഗ്ലക് പരിഷ്‌കാരമാണെന്നാണ് പ്രവാസികളുടെ അഭിപ്രായം.
പരിഷ്‌കരണം പ്രവാസി സമൂഹത്തിനിടയില്‍ കടുത്ത എതിര്‍പ്പിനും വഴിവച്ചിട്ടുണ്ട്. ഇതിനെതിരേ പ്രധാനമന്ത്രിക്കും വിദേശകാര്യമന്ത്രി സുഷമാ സ്വരാജിനും പ്രവാസികള്‍ കത്തയച്ചു.