കേപ് ടൗണ്‍: തുടര്‍ച്ചയായി മൂന്നാം പോരാട്ടത്തിലും ദക്ഷിണാഫ്രിക്കയെ തകര്‍ത്ത് ഇന്ത്യ ആറ് മത്സരങ്ങളടങ്ങിയ പരമ്പര 3-0ത്തിന് നേടി ഭദ്രമാക്കി. മൂന്നാം പോരാട്ടത്തിലും യുസ്‌വേന്ദ്ര ചഹല്‍- കുല്‍ദീപ് യാദവ് സഖ്യത്തിന്റെ മാന്ത്രിക പന്തുകളുടെ ഗതി അറിയാതെ ദക്ഷിണാഫ്രിക്കന്‍ ബാറ്റിങ് നിര വീഴുകയായിരുന്നു. ഇനി മൂന്ന് മത്സരങ്ങള്‍ അവശേഷിക്കേ ഒരു വിജയം കൂടി നേടിയാല്‍ ചരിത്രത്തിലാദ്യമായി ദക്ഷിണാഫ്രിക്കയില്‍ പരമ്പര വിജയമെന്ന നേട്ടവും ഇന്ത്യക്ക് സ്വന്തം. മൂന്നാം പോരാട്ടത്തില്‍ 124 റണ്‍സിനാണ് ഇന്ത്യ വിജയിച്ചത്. ആദ്യം ബാറ്റ് ചെയ്ത ഇന്ത്യ നിശ്ചിത 50 ഓവറില്‍ ആറ് വിക്കറ്റ് നഷ്ടത്തില്‍ 303 റണ്‍സെന്ന മികച്ച സ്‌കോര്‍ പടുത്തുയര്‍ത്തിയപ്പോള്‍ ദക്ഷിണാഫ്രിക്കന്‍ പോരാട്ടം 40 ഓവറില്‍ 179 റണ്‍സില്‍ അവസാനിച്ചു. മൂന്നാം വിജയത്തോടെ പരമ്പര നഷ്ടമാകില്ലെന്ന് ഉറപ്പിക്കാനും ഇന്ത്യക്ക് സാധിച്ചു.
ഡുമിനി (51), ക്യാപ്റ്റന്‍ മാര്‍ക്രം (32), മില്ലര്‍ (25) എന്നിവര്‍ മാത്രമാണ് ദക്ഷിണാഫ്രിക്കന്‍ നിരയില്‍ പിടിച്ചു നിന്നത്. ചഹല്‍, കുല്‍ദീപ് നാല് വീതം വിക്കറ്റുകള്‍ വീഴ്ത്തി എട്ട് വിക്കറ്റുകള്‍ പങ്കിട്ടപ്പോള്‍ ശേഷിച്ച രണ്ട് വിക്കറ്റുകള്‍ ബുമ്‌റ നേടി.
ടോസ് നേടി ദക്ഷിണാഫ്രിക്കന്‍ നായകന്‍ മാര്‍ക്രം ഇന്ത്യയെ ബാറ്റ് ചെയ്യാന്‍ അനുവദിച്ചു. നായകന്റെ തീരുമാനം തുടക്കത്തില്‍ തന്നെ രോഹിത് ശര്‍മയെ റണ്ണെടുക്കാന്‍ അനുവദിക്കാതെ പുറത്താക്കി റബാഡ ശരിയാണെന്ന് തെളിയിച്ചെങ്കിലും പിന്നീട് കഥ മാറി. രണ്ടാമനായി ക്രീസിലെത്തിയ കോഹ്‌ലി സഹ ഓപണര്‍ ശിഖര്‍ ധവാനെ കൂട്ടുപിടിച്ച് പോരാട്ടം ദക്ഷിണാഫ്രിക്കന്‍ ക്യാംപിലേക്ക് നയിച്ചു.
ഇരുവരും ചേര്‍ന്ന് രണ്ടാം വിക്കറ്റില്‍ കൂട്ടിച്ചേര്‍ത്ത 140 റണ്‍സ് ഇന്ത്യന്‍ ഇന്നിങ്‌സില്‍ നിര്‍ണായകമായി. പരമ്പരയിലെ രണ്ടാം സെഞ്ച്വറിയുമായി നായകന്‍ വിരാട് കോഹ്‌ലി ഇന്ത്യയെ മുന്നില്‍ നിന്ന് നയിച്ചു. ഏകദിന കരിയറിലെ 34ാം ശതകമാണ് കോഹ്‌ലി കേപ് ടൗണില്‍ സ്വന്തമാക്കിയത്. 159 പന്തില്‍ 12 ഫോറും രണ്ട് സിക്‌സും സഹിതം 160 റണ്‍സെടുത്ത് നായകന്‍ പുറത്താകാതെ നിന്നു. 63 പന്തില്‍ 12 ഫോറുകളുടെ അകമ്പടിയുമായി ധവാന്‍ 76 റണ്‍സുമായി മടങ്ങി. പിന്നീട് കൃത്യമായ ഇടവേളകളില്‍ ഇന്ത്യക്ക് വിക്കറ്റുകള്‍ നഷ്ടമാകാന്‍ തുടങ്ങി.
രഹാനെ (11), ഹര്‍ദിക് പാണ്ഡ്യ (14), ധോണി (10), കേദാര്‍ ജാദവ് (ഒന്ന്) എന്നിവര്‍ തുടരെ പുറത്തായപ്പോഴും കോഹ്‌ലി ഒരു വശം കാത്തു. എട്ടാമനായി ക്രീസിലെത്തിയ ഭുവനേശ്വര്‍ കുമാര്‍ കോഹ്‌ലിയെ പിന്തുണച്ചതോടെ നായകന്‍ ഇന്ത്യന്‍ സ്‌കോര്‍ ക്ഷണത്തില്‍ 300 കടത്തി. കോഹ്‌ലി- ഭുവനേശ്വര്‍ സഖ്യം അവസാന 44 പന്തില്‍ അടിച്ചെടുത്തത് 67 റണ്‍സ്. ഭുവനേശ്വര്‍ പുറത്താകാതെ16 റണ്‍സെടുത്തു. ദക്ഷിണാഫ്രിക്കയ്ക്കായി ജെ.പി ഡുമിനി രണ്ട് വിക്കറ്റുകള്‍ വീഴ്ത്തി.