ദോഹ: ഖത്തര്‍ ദേശീയ ദിനത്തോടനുബന്ധിച്ചു ഫ്യൂജി ഫിലിം ക്യൂ.പി.സി ഖത്തര്‍ നടത്തിയ ഫോട്ടോഗ്രഫി മത്സരത്തില്‍ എ.കെ ബിജുരാജിന് രണ്ടാം സ്ഥാനം.

ഫിലിപ്പൈന്‍ സ്വദേശിയായ ലിംബോ റിച്ചാര്‍ഡിനാണ് ഒന്നാം സ്ഥാനം. മൂന്നാം സ്ഥാനം അര്‍ജന്റീനയുടെ ഡിനോ അഡ്രിയാനോ പാലസ്സിക്കാണ്. കത്താറ ആംഫി തിയേറ്ററില്‍ പ്രദര്‍ശിപ്പിച്ച സിറിയയെക്കുറിച്ചുള്ള ഡോക്യുമെന്ററി വീക്ഷിക്കുന്ന സിറിയന്‍ പെണ്‍കുട്ടിയുടെ ചിത്രമാണ് ബിജുരാജിന് സമ്മാനം നേടി കൊടുത്തത്. 165 ഓളം ചിത്രങ്ങളില്‍ നിന്നാണ് സമ്മാനാര്‍ഹമായ ചിത്രങ്ങള്‍ തിരഞ്ഞെടുത്തത്.

ലാന്‍ഡ് മാര്‍ക്ക് ഫുജി ഷോറൂമില്‍ നടന്ന ചടങ്ങില്‍ ടെക്‌നോ ബ്ലൂ ഫുജി ഖത്തര്‍ സീനിയര്‍ മാനേജര്‍ പ്രഭുനാഥന്‍, അസിസ്റ്റന്റ് മാനേജര്‍ ഷര്‍മീസ്, പ്രശസ്ത ഫോട്ടോഗ്രാഫര്‍മാരായ അഹമ്മദ് അല്‍ ഖുലൈഫി, ഇഹാബ് അക്തര്‍ എന്നിവരും പങ്കെടുത്തു.

ദോഹ ആസ്പയര്‍ അക്കാദമിയുടെ സ്‌പോര്‍്ട്‌സ് മാഗസിനായ ദോഹ സ്‌റ്റേഡിയം മാഗസിന്റെ ഫോട്ടോഗ്രാഫറാണ് എ.കെ.ബിജുരാജ്. ദോഹ ഫിലിം ഇന്‍സ്റ്റിറ്റ്യൂട്ടിന്റെ 48 അവര്‍ ചലഞ്ച് സോഷ്യല്‍, ഖത്തര്‍ ഒളിമ്പിക് കമ്മറ്റി കായിക ഫോട്ടോഗ്രഫി അവാര്‍ഡ്, ക്യു.എന്‍.ബി ഫുട്‌ബോള്‍ ഫോട്ടോഗ്രഫി അവാര്‍ഡ്, ഖത്തര്‍ അമീരി ഗാര്‍ഡ് ഫോട്ടോഗ്രഫി അവാര്‍ഡ്, ഖത്തര്‍ അമീരി ഗാര്‍ഡ് ക്യു.എന്‍.ഡി.ഫോട്ടോഗ്രഫി അവാര്‍ഡ് തുടങ്ങി നിരവധി പുരസ്‌കാരങ്ങള്‍ നേടിയിട്ടുണ്ട്. കണ്ണൂര്‍ കൊയ്യം സ്വദേശിയാണ് ബിജുരാജ്. ബോബിയാണ് ഭാര്യ. ബിര്‍ള പബ്ലിക് സ്‌കൂളിലെ നാലാം ക്ലാസ് വിദ്യാര്‍ഥിനിയായ ദിയ മകളാണ്.