ഓക്ക്‌ലന്‍ഡ്: റെക്കോര്‍ഡ് നേട്ടത്തോടെ ശതകം കുറിച്ച് ക്യാപ്റ്റന്‍ കെയ്ന്‍ വില്ല്യംസന്‍ പട നയിച്ചപ്പോള്‍ ഇംഗ്ലണ്ടിനെതിരായ ഒന്നാം ക്രിക്കറ്റ് ടെസ്റ്റില്‍ ന്യൂസിലന്‍ഡ് മികച്ച ലീഡിലേക്ക്. മഴ മുക്കാല്‍ ഭാഗവും അപഹരിച്ച രണ്ടാം ദിനത്തില്‍ കളി നിര്‍ത്തുമ്പോള്‍ ന്യൂസിലന്‍ഡ് നാല് വിക്കറ്റ് നഷ്ടത്തില്‍ 229 റണ്‍സെന്ന നിലയില്‍. ആറ് വിക്കറ്റുകള്‍ കൈയിലിരിക്കേ ന്യൂസിലന്‍ഡിന് 171 റണ്‍സ് ലീഡ്. നേരത്തെ ആദ്യ ഇന്നിങ്‌സില്‍ ഇംഗ്ലണ്ടിന്റെ പോരാട്ടം വെറും 58 റണ്‍സില്‍ അവസാനിപ്പിച്ചാണ് കിവികള്‍ ഒന്നാം ഇന്നിങ്‌സ് ബാറ്റിങ് തുടങ്ങിയത്. കളി നിര്‍ത്തുമ്പോള്‍ ഹെന്റി നിക്കോള്‍സ് (49), വാട്‌ലിങ് (17) എന്നിവരാണ് ക്രീസില്‍.
102 റണ്‍സെടുത്ത് പുറത്തായ കെയ്ന്‍ വില്ല്യംസന്‍ ന്യൂസിലന്‍ഡിനായി ഏറ്റവും കൂടുതല്‍ ടെസ്റ്റ് സെഞ്ച്വറികള്‍ നേടുന്ന താരമെന്ന റെക്കോര്‍ഡ് സ്വന്തമാക്കി.
കരിയറിലെ 18ാം ശതകം കുറിച്ച നായകന്‍ സഹ താരം റോസ് ടെയ്‌ലര്‍, ഇതിഹാസ താരം മാര്‍ട്ടിന്‍ ക്രോ എന്നിവര്‍ക്കൊപ്പം 17 സെഞ്ച്വറികളുമായി റെക്കോര്‍ഡ് പങ്കിടുകയായിരുന്നു. ഇംഗ്ലണ്ടിനായി ജെയിംസ് ആന്‍ഡേഴ്‌സന്‍ മൂന്ന് വിക്കറ്റുകള്‍ വീഴ്ത്തി.