പാലാ : ബസിന്റെ മുന്‍വാതിലിലൂടെ തെറിച്ചുവീണ് മദ്ധ്യവയസ്‌കക്ക് ഗുരുതര പരുക്ക്. കൂത്താട്ടുകുളം താഴത്ത്പുറത്ത് സിന്ധു(46) വിനാണ് സാരമായി പരുക്കേറ്റത്. പാലാ കെ.എസ്.ഇ.ബിക്ക് സമീപം ഇന്നലെ വൈകിട്ട് 5.30 ഓടെയാണ് അപകടം. പാലാ-കൂത്താട്ടുകുളം റൂട്ടിലോടുന്ന അകശാല ബസിന്റെ മുന്‍വശത്തെ വാതിലിലൂടെയാണ് ഇവര്‍ റോഡിലേക്ക് തെറിച്ചുവീണത്. ഉടന്‍തന്നെ ജീവനക്കാരും നാട്ടുകാരും ചേര്‍ന്ന് ആശുപത്രിയിലെത്തിച്ചു.
പാലാ ജനറല്‍ ആശുപത്രിയില്‍ ചികിത്സയിലാണ്. കഴിഞ്ഞമാസം ഈരാട്ടുപേട്ടയില്‍ ഗര്‍ഭിണിയായ യുവതി ബസില്‍ നിന്നും യുവതി വീണ് മരിച്ചതിനെ തുടര്‍ന്ന് തുറന്നിട്ട വാതിലുമായി സര്‍വ്വീസ് നടത്തുന്ന വാഹനങ്ങള്‍ക്കെതിരെ മോട്ടോര്‍ വാഹനവകുപ്പും പൊലിസും കര്‍ശന നടപടി സ്വീകരിച്ചിരുന്നു. വാതിലുകള്‍ തുറന്നിട്ട് സര്‍വ്വീസ് നടത്തുന്ന ബസുകളെ പിടികൂടുന്നതിനായി ഫോട്ടോ അയച്ചുതരാനുള്ള വാട്‌സ് ആപ് നമ്പരും പൊലിസ് നല്‍കിയിരുന്നു. എന്നാല്‍ പൊലിസ് പരിശോധന നിര്‍ത്തിയതോടെ ബസുകള്‍ ഇത്തരത്തില്‍ സര്‍വ്വീസ് പുനരാരംഭിച്ചിരിക്കുകയാണ്.