പുതുക്കാട്: കുറുമാലി പുഴയുടെ നെല്ലായി കടവില്‍ കടത്തു കടക്കുന്ന യാത്രക്കാര്‍ക്കു വേണ്ടി പുതുക്കാട് പഞ്ചായത്ത് ജീവന്‍ രക്ഷാ ഉപാധികള്‍ കൈമാറി.
ലൈഫ് ജാക്കറ്റും എയര്‍ബാഗും ഉള്‍പ്പെടെയുള്ള സംവിധാനങ്ങളാണു കടവിലേക്കു നല്‍കിയിരിക്കുന്നത്. ഇന്‍ഷൂറന്‍സ് ഏര്‍പ്പെടുത്തുന്നതുമായി ബന്ധപ്പെട്ട അനിശ്ചിതത്വം മൂലം പഞ്ചായത്ത് കടത്തുവഞ്ചി നീരിലിറക്കാതെ ഏറെക്കാലം മഴയും വെയിലും കൊണ്ടു കരയ്ക്കിരിക്കുകയായിരുന്നു. സംഭവം വാര്‍ത്തയായതോടെ പഞ്ചായത്ത് ഇടപെട്ടു കടത്തു പുനസ്ഥാപിക്കുകയായിരുന്നു. രണ്ടു മാസം മുന്‍പു വഞ്ചികടത്ത് പുനരാരംഭിച്ചുവെങ്കിലും സുരക്ഷാ സൗകര്യങ്ങള്‍ ഏര്‍പ്പെടുത്തിയിരുന്നില്ല. പഞ്ചായത്ത് അനുവദിച്ച രണ്ടു ലക്ഷം രൂപ കൊണ്ടാണു കടത്തു തുടങ്ങിയത്. ഒരു വര്‍ഷത്തേക്കാണു കരാര്‍. ഒരു സമയം പത്തു യാത്രക്കാര്‍ക്കു കടത്തും സുരക്ഷാ സംവിധാനങ്ങളും ഉപയോഗിക്കാം. യാത്രക്കാര്‍ക്കുള്ള ജീവന്‍ രക്ഷാ ഉപാദികളും ഈ ഫണ്ടില്‍ ഉള്‍പ്പെട്ടിരുന്നു. പഞ്ചായത്ത് പ്രസിഡന്റ്് അമ്പിളി ശിവരാജന്‍ ജീവന്‍ രക്ഷാ ഉപാദികള്‍ കൈമാറി.