പഴയങ്ങാടി: യാത്രക്കാര്‍ക്ക് എന്നും ദുരിതം മാത്രം സമ്മാനിക്കുന്ന താവം റയില്‍വേ ഗേറ്റില്‍ ഒടുവില്‍ മുഖ്യമന്ത്രി പിണറായി വിജയനും കുടുങ്ങി.
ഇന്നലെ വൈകിട്ട് ആറിന് 12 മിനുട്ട് നേരമാണ് ഗേറ്റിന് മുന്നില്‍ മുഖ്യമന്ത്രിയും വാഹനവ്യൂഹവും പെട്ടത്. ആറു മണിക്ക് കടന്നുപോകേണ്ട ചെന്നൈ മെയിലിന് പോകാന്‍ വേണ്ടി ഗേറ്റ് അടക്കുന്നതിന് ഒരു മിനുട്ട് മുമ്പേ വാഹനവ്യൂഹം ഗേറ്റ് കടക്കാനുള്ള ശ്രമം നടത്തിയെങ്കിലും നടന്നില്ല. പതിവുപോലെ ഉണ്ടാകുന്ന ബ്ലോക്കില്‍പ്പെട്ട് ഗേറ്റിന് സമീപം എത്തുമ്പോഴേക്കും ഗേറ്റടച്ചിരുന്നു. വൈകിട്ട് ആറിന് അടച്ച ഗേറ്റ് 6.12 ഓടെയാണ് തുറന്നത്. കാസര്‍കോട് ഭാഗത്തുള്ള പൊതുപരിപാടിക്ക് ശേഷം കണ്ണൂര്‍ ഭാഗത്തേക്ക് പോകുന്നതിനിടെയാണ് താവം ഗേറ്റ് വഴിയുള്ള യാത്രാദുരിതത്തില്‍ മുഖ്യമന്ത്രിയും താവം റെയില്‍വേ ഗേറ്റില്‍ കുടുങ്ങിയത്.