കൊച്ചി: ഹോക്കി താരങ്ങളുടെ കൂട്ടായ്മയായ എറണാകുളം ഹോക്കി ലവേഴ്‌സിന്റെ നേതൃത്വത്തില്‍ മുന്‍ സംസ്ഥാന യൂനിവേഴ്‌സിറ്റി ഹോക്കി താരം ജോസഫ് ജെ ഷെറിയുടെ ഓര്‍മയ്ക്കായി ഇന്‍വിറ്റേഷന്‍ ഹോക്കി ടൂര്‍ണമെന്റ് സംഘടിപ്പിക്കുന്നു. 21, 22 തിയതികളില്‍ മറൈന്‍ഡ്രൈവ് ഹെലിപ്പാഡില്‍ നടക്കുന്ന ടൂര്‍ണമെന്റില്‍ സംസ്ഥാനത്തിനകത്തും പുറത്തു നിന്നുമായി 12 ടീമുകള്‍ മത്സരിക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. ഫ്‌ളഡ്‌ലിറ്റില്‍ വൈകിട്ട് മൂന്ന് മുതല്‍ രാത്രി പത്ത് വരെയാണ് മത്സരങ്ങള്‍. ചാംപ്യന്‍ ടീമിന് 25000 രൂപയും ട്രോഫിയും റണ്ണേഴ്‌സ് അപ്പിന് 12500 രൂപയും ട്രോഫിയും സമ്മാനമായി നല്‍കും. കേരള ഹോക്കിയുടെ സഹകരണത്തോടെയാണ് ടൂര്‍ണമെന്റ്.
മഹാരാജാസ് കോളജ് ഗ്രൗണ്ടിലെ ഹോക്കി ടര്‍ഫില്‍ നടത്താന്‍ നിശ്ചയിച്ചിരുന്ന ടൂര്‍ണമെന്റ് ടര്‍ഫിന്റെ മോശം സാഹചര്യം കണക്കിലെടുത്താണ് മറൈന്‍ ഡ്രൈവിലേക്ക് മാറ്റിയതെന്ന് ഭാരവാഹികള്‍ പറഞ്ഞു.വിനു കുമാര്‍, ആയില്യന്‍, സക്കറിയ കട്ടിക്കാരന്‍, ശോഭന്‍ ജോര്‍ജ്, നൗഫല്‍ വാര്‍ത്താസമ്മേളനത്തില്‍ പങ്കെടുത്തു.